يعني ايه بطاقة خصم مباشر؟

بطاقة الخصم المباشر هي بطاقة دفع عن طريق حسابك الشخصي أو حساب التوفير تقدر عن طريقها تشتري احتياجاتك من غير فلوس كاش بس من الفلوس اللي موجودة في حسابك ، ومن أهم مميزات بطاقات الخصم المباشر:

• حسابات بنكية: تقدر تربط بطاقة الخصم المباشر بأكتر من حساب في نفس البنك عشان تدفع براحتك، كمان فيه بنوك بتسمحلك تسحب فلوس من ماكينات السحب الخاصة بيها من غير أي رسوم للسحب.
• شبكة الدفع: هي الأماكن اللي بتسمحلك تستخدم فيها بطاقة الخصم بتاعتك، وأكبر شبكتين دفع هما فيزا و ماستر كارد ومعظم البطاقات الموجودة دلوقتي هي بيتم إصدارها من الشبكتين دول. 

هل بطاقات الخصم آمنة للاستخدام؟

في معاملات سنوية بتتم عن طريق الكريدت كارد و بطاقات الخصم  بأكتر من 3 تريليون دولار أمريكي، وده عشان الناس متقبلة استخدامها بشكل كبير، وبيمثل الاحتيال أو النصب في بطاقات الائتمان أو الخصم حوالي 1% بس من إجمالي المعاملات، وعشان كده استخدام بطاقات الخصم آمن بشكل كبير.

بطاقات الخصم عندها أنظمة حماية للحد من السرقة:

• الـ CCV: ده رقم حماية موجود في ضهر الكارد، و هتلاقيه مكتوب بعد رقم الكارد.
• كلمة المرور لمرة واحدة "OTP": معظم المعاملات الالكترونية اللي بتتم من خلال بطاقات الخصم بتطلب منك

 الـ "OTP" اللي بتتبعت من البنك على موبايلك لتأكيد عملية الدفع وده طبعاً لزيادة الأمان.

• الشريحة: معظم بطاقات الخصم الجديدة بتحتوي على شريحة وهي دي المسئولة عن الرقم السري اللي بيتطلب منك وقت الدفع.
• البنك: البنوك ليها دور كبير في تقليل المخاطرة عن طريق مراقبة المعاملات و التأكد ان معلومات العميل هي نفس معلومات صاحب الكارد ( زي السؤال عن العنوان ورقم الموبايل وقت الدفع اونلاين)

من أهم عوامل الأمان لاستخدام بطاقات الخصم هي طريقة استخدامك، وعشان كده فيه قواعد للأمان لازم تتبعها:

• ماتديش رقم الكارد بتاعك لأي حد.
• ماتقولش الرقم السري بتاعك لأي حد.
• ماتستخدمش الكريدت كارد بتاعك في المدفوعات الاونلاين في مواقع ماتعرفهاش.

ايه الفرق بين بطاقة الخصم المباشر وبطاقة الائتمان(الكريدت كارد)؟

الفرق الأساسي بين الاتنين ان الكريدت كارد تعتبر أقرب للقرض، أما بطاقة الخصم بتسمحلك تدفع بس من حسابك الشخصي، في الوقت اللي الكريدت كارد بتدفع عن طريق فلوس البنك بيسلفهالك.

ايه هي الاوراق المطلوبة؟

الأوراق المطلوبة لبطاقات الخصم هي نفس أوراق فتح حساب في البنك وهي:

عام (للكل) 

• بطاقة الرقم القومي أو جواز سفر
• إثبات للعنوان (إيصال مرافق)

هي بطاقة الخصم تكلفتها قد ايه؟

في حاجتين لازم تعمل حسابهم لما تيجي تحدد تكلفة بطاقة الخصم:

1. مصاريف الاصدار: دي مصاريف بتدفعها للبنك في الأول عشان تطلع الكارد، ودي بتختلف من بنك لبنك وكمان بتختلف حسب نوع الكارد.
2. مصاريف التجديد: لما الكارد ينتهي صلاحيته بتدفع مصاريف عشان تجدده.