يعني ايه فايدة؟

الفايدة هي المبلغ المطلوب منك تدفعه فوق مبلغ القرض الأصلي كمثال: لو انت استلفت 100 جنيه ومطلوب منك تردهم 110 جنيه يبقى كده المبلغ الاصلي هو 100 جنيه والفايدة 10 جنيه.

ايه هو سعر الفايدة وازاي نحسبه؟

سعر الفايدة هو مصطلح يعبر عن الفايدة اللي هتدفعها خلال مدة زمنية معينة، وبتكون دايماً نسبة مئوية (زي مثلاّ 14%) وفي اغلب الاوقات بتكون نسبة الفايده محسوبة على السنة الواحدة بس ده مش دايماَ.

زي المثال اللي فات: هنفترض انك استلفت 100 جنية لمدة سنة ومطلوب منك ترجعهم 110 جنيه يبقى سعر الفايدة بتاع الـ 10 جنيه هو 10% في السنة.

هل كل المنتجات البنكية فايدتها بتتحسب سنوياً؟

زي ما قلنا قبل كده ان في أغلب الأوقات اسعار الفايدة بتتحسب سنوياً لكن باستثناء بطاقات الائتمان (الكريدت كارد) اللي بتتحسب فايدتها بشكل شهري.

ايه الفرق بين سعر الفايدة الثابت وسعر الفايدة المتناقص؟

في الاول لازم ننفي اشاعة ان سعر الفايدة الثابت أوفر أو أرخص من سعر الفايدة المتناقص، في الحقيقة هما الاتنين بيمثلوا نفس الحاجة، يلا نفهمها مع بعض :

سعر الفايدة المتناقص: هو نسبة بتتحسب على المبلغ المتبقي فقط، يعني مثلا: لو انا اخدت قرض بـ 100 جنيه بسعر  فايدة متناقص 12% يبقى انا هدفع 12 جنيه في السنة الأولى ، وفي السنة التانية هنفترض اني دفعت 20 جنيه من مبلغ القرض الاصلي يبقى كده عليا 80 جنيه وبالتالي هدفع فايدة 9.6 جنيه للسنة دي.

سعر الفايدة الثابت: هي متوسط الفايدة اللي هتدفعها خلال مدة القرض، زي المثال اللي فات: هنفترض ان مبلغ القرض هو 100 جنيه وهيتسدد على 5 سنين بالتساوي، ف هتحاسب كالتالي:

• 12 جنيه فايدة للسنة الأولى
• 9.6 جنيه فايدة للسنة التانية
• 7.2 جنيه فايدة للسنة التالتة
• 4.8 جنيه فايدة للسنة الرابعة
• 2.4 جنيه فايدة للسنة الخامسة
• يبقى كده مجموع الفايدة اللي هتدفعها خلال الخمس سنين 36 جنيه.

في مثال الفايدة الثابتة ممكن تتحسب كـ (مجموع الفايدة مقسوم على مبلغ القرض مقسوم على عدد السنين)، وبالتالي لو قسمنا 36 على مبلغ القرض الأصلي:100 وقسمنا الناتج على 5 سنين فالنتيجة هتكون الفايدة الثابتة هي =7.20% ، وبكده يبقى فعلياً الفايدة المتناقصة 12% بتساوي الفايدة الثابتة 7.20%.

أهم حاجة انك تاخد بالك البنك بيقولك على أي نوع من سعر الفايدة وعشان تتأكد، قارن بين مبلغ القسط. 

كل اسعار الفايدة الموجودة في القروض على فايدتي هي اسعار فايدة متناقصة، ولو عايز تعرف سعر الفايدة الثابتة دوس على "المزيد من التفاصيل" الموجودة تحت القرض اللي بتدور عليه.

يعني ايه فايدة مركبة؟

لو بتدور على الشهادات والودائع يبقى لازم تفهم يعني ايه فايدة مركبة، زي ما قلنا قبل كدة ان الفايدة بتتحسب سنوياً، تعالى نقلب المثال اللي فات: لو عملت ايداع بـ 100 جنيه لمدة سنة بسعر فايدة 9%  هستردهم 109 جنيه، إذن مبلغ الإيداع 100 جنيه ومبلغ الفايدة 9 جنيه.

في الايداع، بيكون ليا الاختيار بين اني اخد الفايدة كل 3 شهور، 6 شهور، سنة أو في نهاية المدة، الفايدة المركبة بتكون لما اعمل ايداع لمبلغ لمدة أكتر من سنة واقرر اني استلم مبلغ الفايدة في نهاية المدة، فـ لو رجعنا للمثال اللي فات: لو عملت ايداع بـ 100 جنية بنفس الفايدة اللي فاتت لمدة 3 سنين، يبقى في نهاية السنة الأولى هاخد 9 جنيه فايدة  لكن لو ماخدتش المبلغ ده فـ لما اجي احسب المبلغ الموجود هيكون  109 جنيه مش بس 100 جنيه ، وبكده الفايدة هتتحسب على المبلغ الجديد اللي هو المبلغ الأصلي + مبلغ فايدة السنة اللي فاتت في الحالة دي فايدة السنة التانية هتكون 9.8 جنيه.