أهم 5 صادرات مصرية ونسبتهم من الناتج المحلي الإجمالي؟

قليل أوي لما الواحد بيتكلم عن التصدير لإن مصر اقتصادها معتمد على الاستيراد أكتر بسبب إن إحنا بنستورد أغلب الأساسيات زي القمح والأرز وغيره بالرغم إن زمان كنا معتمدين على إنتاجنا المحلي، ولكن حالياً إنتاجنا المحلي مش بيكفي، وعشان كدة بنستورد الحاجات دي من بلاد تانية، ولكن في نفس الوقت في حاجات كتير تانية بنصدرها للعالم، والصادرات المصرية بتمثل تقريباً 3% من الناتج القومي الإجمالي.

المحروقات

تصدير المحروقات زي الغاز الطبيعي وغيره، والمحروقات بتعمل تقريباً 25% من إجمالي الصادرات المصرية، وأهم خمس دول بيستوردوا من مصر الغاز الطبيعي هم: إيطاليا والأردن واليونان وباكيستان وسنغافورة.

البلاستيك

المنتجات البلاستيكية بتستحوذ على جزء كبير من صادرات مصر خصوصاً للدول الأفريقية المجاورة، وبلغت صادرات مصر من البلاستيك ومشتقاته للدول الأفريقية تقريباً 354 مليون دولار في 2018، وضمت الدول اللي بتستورد منتجات بلاستيكية من مصر: السعودية والإمارات وتركيا.

الصادرات المصرية بتمثل تقريباً 3% من الناتج القومي الإجمالي

الأجهزة والمعدات

بتمثل تقريباً 6% من إجمالي صادرات مصر، وسجلت 1.6 مليار دولار في 2018، ومن المعدات اللي بيتم تصديرها القطارات وإشارات المرور ومعدات المصانع والمعامل.

الفاكهة والخضار

الفاكهة والخضار بتمثل جزء كبير من الصادرات المصرية وفي 2019، مصر صدرت 5.5 مليون طن من الفواكه والخضار، والبرتقال جزء مهم من الصادرات ولوحدة جاب إيرادات تبلغ 750.6 مليون دولار في 2019، وبيتم تصديرة لهولندا وروسيا والصين وغيرها من الدول.

الأسمدة

تعتبر واحدة من بنود الصادرات اللي بتكبر سنة عن سنة، بحيث إن مصر بتصدر تقريباً 50% من إنتاجها من السماد واللي بيبلغ 23 مليون طن في السنة، وبيتم استهلاك من 9 إلى 12 مليون طن محلياً وتصدير الباقي.