اخر نداء لتذكرة سفينة الفضاء New Shepard بـ 28 مليون دولار!

الصيف بدأ، وكلنا بندور على عروض للرحلات عشان نهرب من الحر ونشوف البحر، عشان نقدرنفصل شوية ونشحن طاقتنا من تاني، بس هل الحر ده ممكن يخليك تسافر بره الكوكب كله؟ ده اللي قرر يعمله جيف بيزوس/ Jeff Bezos أنه ياخد أخوه ويسافروا الفضاء عشان يقضوا اجازة صغيرة بالسفينة الفضائية بتاعته، وأعلن أنه في مكان تالت متاح في السفينة لو حد عايز يسافر معاهم مقابل 28 مليون دولار للتذكرة!

مين هو جيف بيزوس؟

جيفري بريستون بيزوس هو رجل أعمال أمريكي ومؤسس موقع أمازون المعروف للشوبينج أونلاين، وكمان مؤخراً بقى عنده محلات بإسم أمازون للتسوق الذكي، والنجاح الكبير اللي حققه أمازون ألهمه يعمل شركة Blue Origin لرحلات السفر للفضاء وهدفها هو أن يكون في وجود دائم للعنصر البشري في الفضاء الخارجي، ده غير ان هو اللي طرح جهاز كيندل/Kindle للقراءة الإلكترونية واللي عن طريقه تقدر تشتري الكتب الالكترونية وتحملها. ويعتبر "جيف" أغنى رجل في العالم بثروة تقدر بـ 197.1 مليار دولار ومتوقع انه يكون من أوائل اللى هياخدوا لقب تريليونير في 2040.

حكاية رحلة الفضاء

جيف بيزوس وأخوه قرروا يقوموا برحلة سموها "أعظم مغامراتهم" يوم 20 يوليو اللي جاي، وهي رحلة للفضاء الخارجي على متن المركبة الفضائية " New Shepard" اللي من انتاج شركة جيف " Blue Origin" وأعلنوا أن متاح مقعد تالت واتباع في مزاد علني بقيمة 28 مليون دولار، بس الكلام ده ما عجبش بعض الناس وقرروا عمل عريضة يوقعوا عليها للمطالبة بعدم رجوع جيف من الفضاء، ووقع عليها لغاية دلوقتي 120 ألف شخص، وسبب اعتراضهم أن الأغنياء دول ماينفعش يكون ليهم مكان على كوكب الأرض ولا حتى في الفضاء، بس طالما اختاروا يروحوا الفضاء فـ بلاش يرجعوا منه.

ايه السبب الحقيقي وراء توقيع العريضة؟
 

الناس مش مضايقة بس من حياة الرفاهية اللي جيف عايشها، لكنهم معترضين أنه مش بيدفع غير ضرايب قليلة جدا بالنسبة لثروته واحيانا كمان مش بيدفع خالص، ده غير انه بيتبرع للأعمال الخيرية بمبالغ صغيرة بالنسبة لثروته، رغم انه أتعهد مؤخراً بتقديم 12 مليار دولار للجهود الخيرية.