تروح فين الساحل الطيب VS الساحل الشرير؟ خناقة كل صيف
تاريخ النشر: 24 يوليو 2022 طرائف وعجائب
الساحل الشرير بداية من الكيلو 110 ناحية مطروح
زي كل سنة ومع بداية موسم الصيف والناس بتدور على أفضل مصيف ليها بأفضل الأسعار، بيجي الكلام عن واحدة من أشهر أماكن المصايف في مصر وهي الساحل الشمالي وخناقة الكلام عن الساحل الطيب والساحل الشرير.
السوشيال ميديا بقالها كام سنة، ومع بداية موسم الصيف بيجي الكلام عن طبيعة الناس اللي بتصيف في الساحل الشمالي سواء الساحل الطيب أو الشرير من حيث عاداتهم هناك والأسعار بتكون عاملة ازاي؟
كمان في شركات سياحية بقت تستخدم مصطلح الساحل الطيب والشرير في التسويق لرحلاتها، اعرف اكتر دلوقتي عن الأماكن بالظبط اللي بتتسمى كدا وليه؟
من الخناقات برضو اللي بتلفت انتباه ناس كتير في كل صيف الكلام عن المايوهات البيكيني والبوركيني، اعرف أكتر عنها من هنا: مايوهات هادية غالب بكام في 2022 وليه غالية؟
ايه هو الساحل الطيب الساحل الشرير؟
خريطة الساحل الشمالي الطيب
دا الساحل اللي قبل مارينا يعني من أول سيدي كرير مرورًا بماربيلا وقرية المهندسين والروضة و نسمة واللوتس والدبلوماسين والمعلمين والتطبيقين.
طبيعة الناس اللي بتروح الساحل الطيب الطبقة المتوسطة من الجمهر اللي بيدوروا على مصيف بأفضل سعر ويقضوا وقت حلو في تأجير العجل والخروجات اللي مش مكلفة أوي، والنشطاء على السوشيال ميديا بيسموهم "غلابة الساحل".
ليه الساحل الطيب اسمه كدا؟
الساحل الشمالى الطيب بيتقال عليه اللقب دا بسبب إن أسعاره منخفضة مقارنة بالساحل الشرير، واللي فيه بتلجأ العائلات إنها تروح هناك وتنبسط في حدود المعقول، ومعظم اللي بيروحوا هناك الطبقة المتوسطة.
اعرف أسعار الشواطئ في إسكندرية من هنا: اعرف أسعار دخول شواطئ الإسكندرية لصيف 2022
خريطة الساحل الشمالي الشرير
من بعد مارينا ٧ هاسيندا وايت و باي و ريد و جرين و بلو و مراسي و أمواج و سيشل وغيرها من القرى السياحية، وتحديدًا بداية من الكيلو 110 ناحية مطروح.
وعلى السوشيال ميديا بيهزروا ويقولوا إن الناس اللي بتروح الأماكن دي في الساحل الشرير بيقعدوا من نص شهر 6 لغاية لحد نص شهر 9 ومابيرجعوش.
هتلاقي في الساحل الشرير الخروجات الجامدة وحفلات النجم الكبار زي عمرو دياب بأسعار خيالية، والأسعار بتزيد هناك كل صيف.
غالبًا علشان تروح الساحل الشرير لازم مرتبك مايقلش عن 10 إلى 15 ألف جنيه على أقل تقدير، وتعمل حسابك إنك لو قضيت أسبوع هناك هتصرف المرتب كله دا لو كفى يعني والإيجارات هناك غالية.
ليه الساحل الشرير اسمه كدا؟
الساحل الشرير اسمه كدا علشان بيتميز بأسعاره الغالية، وأوقات كتير الأسعار هناك بتكون خيالية زي هاسيندا ومراسى وأمواج، ومعظم اللي بيحبوا يروحوا الساحل الشرير هما الشباب، وهتلاقي هناك أحدث صيحات الموضة سواء بقى في الملابس أو الأطعمة أو الشاليهات والديكورات والحفلات الغنائية.
ما بين الساحل الطيب والساحل الشرير
مارينا نفسها بقى لا بتعتبر هي ساحل طيب ولا شرير بشكل صريح، وممكن تلاقي فيها شباب عادي طالعين يصيفوا بميزانية قليلة وممكن تلاقي فيها أغنياء.
