رحلة التعامل بالفلوس من المقايضة للعملات الافتراضية!

حركة البيع والشراء من بداية التاريخ شافت طرق مختلفة خالص قبل اختراع فكرة الفلوس بداية من المقايضة مرورًا بالفلوس الورقية وصولًا للعملات الإلكترونية.

تاريخ نظام المقايضة

نظام المقايضة من أقدم النظم الاقتصادية، يُقال إن أول استخدام لنظام المقايضة بدأ 6000 سنة قبل الميلاد في "ميسوپوتاميا" وهي العراق حاليًا، العلماء اجتمعوا على إن نظام المقايضة عمره ما كان النظام الوحيد المسيطر اقتصاديًا.

ممكن تعرف أكتر عن نظام المقايضة من هنا، اعرف أكتر عن نظام المقايضة

 المقايضة بتعتمد على ايه؟

نظام المقايضة بيعتمد كليًا على تقييم الطرفين لقيمة السلع والخدمات المتاحة، وعشان كده فهو برضه بيعتمد على العلاقات الاجتماعية ما بين الناس لأنه بيتطلب ثقة كبيرة في الطرفين لأن من الممكن إن واحد يقايض سلعة بايظة من غير ما التاني يعرف.

التعامل بالفلوس الورقية

 أول شكل للفلوس كان في شكل ورق بردي أو معمول من جلد الحيوانات، وكان زي الشيكات، وكان بيوعد شخص معين بأن يدفعله مبلغ معين من الفضة أو الذهب، وكانت غالبًا الحكومة هي اللي بتصرفهم.

بيختلف المؤرخين عن بداية التعامل بالنوع ده من الفلوس، في شوية مقتنعين إن الصين هي موقع أول استخدام من النوع ده من الفلوس، وفي ناس تانية بتقول لا ده الرومان هما أول ناس اخترعوا فلوس ورق.

هي الفلوس كانت طول عمرها ورق؟ دا اللي هتعرفه لما تقرأ أكتر من هنا، نبذة عن تاريخ الفلوس الورقية

العملات الإلكترونية هي عبارة عن عملة مش هتقدر تستخدمها إلا من خلال النت

أول بنك طبع فلوس ورق

أول بنك كان بنك سويدي في 1661، والسبب الرئيسي كان إن عملات "الكرونة السويدية" كانت تقيلة جدًا لدرجة إن شيلها مابقاش شيء عملي. بس أول بنك يصدر فلوس دايمة هو بنك إنجلترا في 1695، وكان أول نسخة من الفلوس دي مكتوبة باليد.

وفي مصر، الجنيه الورق اتطبع لأول مرة في سنة 1899 عن طريق البنك الأهلي، وكانوا قبل كدة بيستخدموا عملات مش فلوس ورق.

بداية العملات الإلكترونية (الافتراضية / الرقمية / المشفرة)

هي عبارة عن عملة مش هتقدر تستخدمها إلا من خلال النت، مالهاش تواجد في الحقيقة لكن على النت ليها قيمة حقيقية، وكمان تقدر تحولها لعملات ورقية، وتم الإعلان عن أول عملة رقمية سنة 2008 على يد المبرمج اليابانى " ساتوشى ناكاموتو".

أول اختراق ليها حصل سنة 2010 الأمر اللي خلاها تتعرض لضعف كبير في نظامها، والعملات الإلكترونية الأشهر على الإطلاق البيتكوين ليبرا.

البنك المركزي وقف التعامل بالبيتكوين:

في مارس 2021 أصدر البنك المركزي قرار بوقف التعامل بالعملات الإلكترونية زي البيتكوين أو إصدارها أو الإتجار فيها أو الترويج ليها أو تنفيذ أي أنشطة متعلقة بيها داخل السوق المصري.

اعرف اكتر عن الخبر من فايدتي من هنا، البنك المركزي وقف التعامل بالبيتكوين والعقوبة 10 مليون!