سينجل ومش عارف ترتبط؟ 6 حاجات ممكن تكون السبب

داخل على الـ الفلانتين valentine's day ولسه سينجل؟ لو الموضوع دا مضايقك ومش عارف ترتبط لازم تعرف ايه السبب في حاجات كتير ممكن تكون السبب اعرفها دلوقتي وشوف ايه اللي ممكن تطوره في شخصيتك وطريقة تفكيرك.

عارف إن إحساس الدنيا كلها حواليك ورد ولون أحمر ودباديب وأنت قاعد تحت البطانية متدفي عشان الدنيا ساقعة وممكن كمان تكون بتروش على صحابك المرتبطين وتشير بوستات على فيسبوك بس من جواك متضايق.

بس ماتنساش إن السنجلة جنتله برضو وفي حاجات  كتير المرتبط بيحسد السينجل عليها اعرف أكتر من هنا: 15 حاجة هتوفرها وأنت سينجل ومتنساش الارتباط إحباط!

1-   ممكن تكون بخيل؟!

اسأل نفسك وخليك صريح هل أنت بخيل طيب هل ممكن تكون أناني مش بتفكر غير في اللي بيبسطك بس ومش مهتم بشريكة حياتك اللي ممكن ترتبط بيها؟ الفكرة دايمًا في الأولويات حاول تراجع نفسك.

في فرق بين البخل والحكمة في التعامل مع الفلوس اعرف أكتر من هنا: ازاي تتعامل مع الفلوس بحكمة وانت بتصرفها!

2-   ممكن تكون انطوائي؟

مش كويس في الاجتماعيات ودايمًا بتحب تقعد لوحدك ومش بتتكلم كتير، خايف تعبر عن مشاعرك علشان ماتتصدش؟ مش عارف تكون صداقات، لازم تخلي الدنيا أسهل من كدا وتتكلم وتعبر ماتخفش.

حلو إنك تبقى واثق في نفسك وتقيل بس التقل له حدود برضو فمش أفضل حاجة

3-   ممكن تكون مغرور شوية؟

حلو إنك تبقى واثق في نفسك وتقيل بس التقل له حدود برضو فمش أفضل حاجة تكون تنك لأن البنت مش هتاخد الخطوة ناحيتك إلا لو اتحركت، ولا ممكن تكون مش بيعجبك أي حاجة قدامك؟ ماتنساش إن مفيش حد كامل وكل حد فينا عنده عيوب فبلاش تدور على المثالية لأنك مش مثالي!

4-   ممكن تكون خايف من المسئوليات؟

لو بتحسب حسبتك من بدري وخايف من المصاريف والالتزامات وإنك مش هتبقى حر لازم تفكر بشكل عملي شوية ومتخليش العمر يهرب منك، واسأل نفسك دايمًا طب وبعدين؟! الجواز له إيجابيات برضو إن تلاقي اللي بيحبك وتحبه وتشاركوا بعض وتبنوا بيتكم سوا.

5-   خايف من المشاكل؟

بص مفيش حاجة مفيهاش مشاكل وأنت وسط أسرتك حاليًا وأنت في شغلك وأنت مصاحب وأنت سينجل الحياة كلها كدا ولازم تعرف تتعامل مع كل نوعيات المشاكل والتحديات الهروب مش أفضل حاجة.

6-   ممكن تكون بائس؟!

ليه عايش في دور البؤس في الوقت اللي ممكن تبص فيه فعلًا لنص الكوباية المليان وتفتكر كل حاجة حلوة في حياتك وتبدأ تاخد خطوة علشان تكمل الحاجات الإيجابية وترتبط  ودا هيشجعك إن يبقى عندك دوافع لكل حاجة.

لو لسه بتكون نفسك اعرف أكتر عن التحويش من هنا: 5 طرق للتحويش والتوفير هتساعدك تستقل مادياً عن أهلك