لو بتروح الجيم عشان الفورمة بس: اعرف 8 فوايد تانية

خلاص بدأت السنة الجديدة 2022 وقرارات الـ to do list بتاعتك بتحاول تاخد فيها خطوة إيجابية؟ ها هتبقى إنسان جديد وتروح الجيم وتدفع الاشتراك وتلتزم وتهتم بصحتك؟ كل دا حلو.

بس الحلو أكتر إنك تعرف فوايد ممكن تحققها لما تروح الجيم غير إنك تعمل عضلات وفورمة وتسمع "عااااااش يا وحش"، وياريت لما تدفع اشتراك الجيم تروح وتنتظم مش تدفع من هنا وماتروحش إلا مرة واحدة.

فوايد الجيم غير الفورمة

1- فرق كبير في حياتك اليومية

هتحس بفرق كبير في حياتك اليومية نشاط وحيوية وطاقة طول يومك وأنت طالع السلم وأنت ماشي في الشارع وأنت قاعد ع المكتب وأنت بتتكلم هتحس إن الدنيا مختلفة معاك.

2- حرق الدهون

فكرة إنك بتروح الجيم دا شئ مميز جدًا لجسمك في حرق دهون أكتر حتى لو عكيت في الأكل شوية تقدر تزود كارديو وتحرق سعرات كمان بس بعد كدا خلي بالك من أكلك كويس.

3- صحة الجسم

لو عندك أمراض مزمنة زي السكر والقلب والضغط فالجيم هيساعدك تكون صحتك أفضل مش بس كدا كمان بيقلل خطر الإصابة بالأمراض لما تكون رياضي.

ايه المكملات الغذائية اللي ممكن تاخدها؟ اعرف أكتر من هنا: أشتري ايه مكملات غذائية للجيم والرياضة؟

هتكتسب ثقة في حياتك وفي كل قراراتك

4- واثق من نفسك

لما تروح الجيم هتحس إنك تقدر تتغير بجد وهتثق في نفسك وقدراتك وإمكانية إنك تاخد قرار فعلًا وتنفذه على أرض الواقع وهتلاقي الدنيا سهلة في قراراتك ودا هيديك الإحساس بالرضا عمومًا.

5- عضمك أقوى

بنية جسمك مع الوقت في الجيم هتكون كويسة أكتر وهتلاقي شكل جسمك اتغير للأفضل فمش هتعاني من مشاكل هشاشة العظام أو الكسور لما تكبر.

6- مزاج رايق

زي لما تسمع موسيقى بتحبها بتحس حالتك النفسية أحسن دا اللي بيعمله الجيم بالظبط، والسر في كدا إفراز هرمون الإندروفين وده مسئول عن مزاجك.

ايه هي مصادر البروتين اللي ممكن تاخد منها احتياجك اليومي اعرف أكتر من هنا: أرخص 10 مصادر للبروتين الحيواني والنباتي

7- طاقة إيجابية للي حواليك

لما تروح الجيم هتحس إنك ماشي بتدي طاقة إيجابية لكل اللي حواليك، ودا هيحسسك بفرق ونظرة مختلفة من كل اللي حواليك هتشجع وتتشجع أنت كمان تكمل.

8- عقلية مختلفة

إنك تاخد قرار تروح الجيم وتواظب عليه عدد معين من الأيام بالالتزام دا هيديك عقلية مختلفة في حياتك إنك تقدر تحط هدف وتحققه وحتى لو اتعرضت لانشغالات هتظبط وقتك وترجع تاني.