ليه عم دهب أغني واحد في مجلة ميكي؟

كلنا قرينا مجلة ميكي وحافظين شخصياتها، بطوط منحوس ومحظوظ اسم علي مسمي وعم دهب اغني واحد في مدينة البط، وأكيد الفلوس ديه مجتش  بالساهل، عشان كده هنقولكم على شوية نصايح من حياة عم دهب ساعدته على التحويش ممكن تساعدكم.

الأكل

كلنا متفقين أن الإنسان بيأكل عشان يعيش مش بيعيش عشان يأكل، عشان كده عم دهب مش بيأكل كميات كبيرة من الأكل، ده غير أنه استحالة يروح مطعم غالي إلا لو معزوم.

اللبس

المليونير مش بهدومه، ودي معلومة أكدها عم دهب بلبسه اللي مبيتغيرش من سنين وشاركه فيها مارك زوكربيرج مؤسس الفيسبوك اللي عمال يشتري كل الابلكيشن اللي بنستخدمها زي الانستجرام والواتساب، مارك مبيغيرش التي شيرت الرمادي مع البنطلون الجينز، وده تأكيد علي أن لبس البرندات اللي بتخلص عليه مرتبك مش دليل أن معاك فلوس.

الطيارة الخاصة

عم دهب قدم لنا درس في الاقتصاد لما أشتري طيارة خاصة، لأن ببساطة ده رجل أعمال معظم مشاريعه بتحتاج منه سفر مسافات طويلة، يبقي ليه ميدفعش مبلغ كبير مرة واحدة في طيارة بدل ما يدفع إيجار كل شوية، وده كمان اللي عمله مع العربية، والأهم من كده أنه اتعلم سواقة الاتنين عشان ميحتجش لموظفين بمرتب شهري.

رجل الأعمال الشاطر لازم يهتم بكل جديد ممكن يطور في شغله، ده اللي بيخلي عم دهب يهتم بمشاريع عبقرينو الجديدة

خدمة قصاد خدمة

الأقربون أولي بالمعروف عشان كده عم دهب مشغل بطوط ابن أخوه معاه بمرتب أي كلام عشان ده الوحيد اللي هيستحمله، طبعا ديه مش نصيحة كويسة نأخدها لكنها باب لفكرة خدمة قصاد خدمة، يعني صاحبك اللي بيشتغل في السوشيال ميديا ممكن يمسكلك صفحتك قصاد ان تعمله خصم خاص على المنتج بتاعك مثلا، ويبيقي الكل استفاد.

التكنولوجيا

رجل الأعمال الشاطر لازم يهتم بكل جديد ممكن يطور في شغله، ده اللي بيخلي عم دهب يهتم بمشاريع عبقرينو الجديدة ويغامر ويدفع فيها كتير لما يتأكد انها هتفيد شغله وهتكسبه فلوس كتير. وده اللي المفروض نعمله قبل ما نتدبس في اجهزة غالية على الفاضي.

علي فكرة فايدتي كمان بتحب تستخدم التكنولوجيا زي أنك تقدر تقدم علي الكريدت كارد والقرض الشخصي من عندنا أونلاين وانت في مكانك ببلاش.

الهدايا

"عم دهب مش بخيل، عم دهب حريص" ديه جملة إدوارد في فيلم بنات العم، وهي حقيقة لأنه لو بخيل مكنش جاب هدايا لعيلته كلها في رأس السنة، لكنه بيفضل تكون حاجات محتاجينها فعلا وسعرها مش غالي، ده غير أنه بيفرح أوي بالهدايا المفيدة أي إن كان سعرها، يعني مثلا كيكة من الجدة بطة عنده أحلى كتير من قلم بفصوص من محظوظ.