موعد لقاء مصر والسنغال: سيناريو المكسب والخسارة

اعرف موعد لقاء مصر والسنغال في المرحلة الحاسمة من التصفيات المؤهلة لكأس العالم 2022، وهيكون في ماتشين حاسمين واحد في مصر والتاني في السنغال خلال شهر مارس 2022 اعرف كل حاجة عنهم دلوقتي.

الاتحاد الأفريقي لكرة القدم بلغ الاتحاد المصري بموافقته على تعديل موعد مباراة العودة بين منتخبي مصر والسنغال في الدور الحاسم من التصفيات الأفريقية المؤهلة لبطولة كأس العالم 2022 في قطر.

الفراعنة عندهم تار

أكيد المنتخب المصري الملقب بالفراعنة عاوز ياخد بتاره من المنتخب السنغالي الملقب بأسود التيرانجا ويتأهل على حسابه لكأس العالم في قطر، بعد ما السنغال فازت على مصر في نهائي أمم أفريقيا 2021 وحققوا أول لقب في تاريخهم.

ايه اللي اتغير في مواعيد ماتشات مصر والسنغال؟

كان من المفترض إن لقاء مصر والسنغال في الذهاب هيتلعب في القاهرة يوم الجمعة 25 مارس 2022، وماتش العودة هيتلعب في داكار يوم الإثنين 28 من نفس الشهر.

لكن الكاف وافق على طلب مصر في تأجيل المباراة ليوم واحد كمان علشان يتلعب لقاء مصر والسنغال في العودة يوم 29 مارس 2022.

تاريخ مواجهات الفراعنة وأسود التيرانجا اعرف دلوقتي من هنا: تاريخ مواجهات مصر والسنغال: اتقابلوا 14 مرة

موعد ماتشات مصر والسنغال في المرحلة الحاسمة من التصفيات المؤهلة لكأس العالم 2022:

• مباراة الذهاب هتكون في القاهرة: الساعة 7:30 مساء الجمعة الموافق 25 مارس 2022.
• مباراة العودة هتكون في داكار: الساعة 5:00 مساء الثلاثاء الموافق 29 مارس 2022.

مصر والسنغال اتأهلوا لكأس العالم كام مرة؟

المنتخب المصري 3 مرات: 1934 و 1990 و 2018.

المنتخب السنغالي مرتين بس: 2002 و2018.

اعرف القيمة التسويقية للفريقين وكل المعلومات من هنا: قبل مباراة مصر والسنغال.. الأرقام في صالح مين؟

سيناريو المكسب والخسارة في لقاء مصر والسنغال

المنتخب المصري وصل للدور التالت من منافسات التصفيات للوصول لكأس العالم في قطر 2022، وكل اللي محتاجه حاليًا إنه يفوز بمجموع ماتشين الذهاب والعودة ضد السنغال وهيتأهل مباشرة لكأس العالم.

في حال الفوز فالمنتخب المصري هيكون اتأهل لكأس العالم للمرة التانية على التوالي والرابعة في تاريخه أما لو كسب المنتخب السنغالي هيكون وصل للمونديال العالمي للمرة التانية على التوالي والتالتة في تاريخه.