3 حاجات لازم تبص عليها وأنت بتشتري عربية مستعمله مانيوال!
تاريخ النشر: 09 يناير 2022 طرائف وعجائب
دوس دبرياج للآخر والمحرك شغال واسمع صوت الموتور اختلف ولا لا؟
ايه هي خطوات شراء سيارة مستعملة؟ وازاي تختارها بدون ما تتعرض لأي عمليات نصب 3 حاجات لازم تبص عليها كويس جدًا اعرفها دلوقتي
لكن لو بتشتري عربية أوتوماتيك اعرف أكتر، 3 حاجات لازم تبص عليها وأنت بتشتري عربية مستعملة اوتوماتيك!
تبص على ايه وأنت بشتري عربية مانيوال مستعملة؟
1- المعاينة الخارجية
شوفها الصبح: علشان تبقى واضحة أكتر ولو فيها أي حاجة تقدر تشوفها بوضوح.
لف حواليها: أقف من بعيد وبص على العربية من كل الاتجاهات.
لون البويات: ركز هل هي موحدة ولا في فرق في البوية بين الرفرف أو الباب أو الكبوت هتلاقي الفرق في درجة اللون.
جنب العربية وسقفها: بص عليهم كويس وكمان الكبوت هل مستويين ولا لا.
المسافات بين الأبواب: بص على فواصل الصاج وشاسيه الاكصدام وأي مسافات بين الأبواب، وحط في اعتبارك إن اللي بيصلح العربية قبل ما يبيعها ما بيبصش على العربية من الأسفل.
طرف الكبوت: بص عليه كويس وخاصة المسامير اللي بتثبت الكبوت بجسم العربية هل عليها علامات بويات رش ولا لا.
بص على دول كمان: بص على شنطة العربية والأبواب بنفس الطريقة بالظبط.
بص على فرش الصالون والكراسي والتابلوه وكل الكماليات واتأكد إنها شغالة.
لو العربية فيها تكييف بص عليه كويس وماتشتريش عربية محتاجة شحن تكييف علشان ببساطة صيانته غالية.
قطعت كام كيلو؟: ماتنساش تشوف كام كيلو السيارة عملتها وحالة الطارة ايه اخبارها وكمان مقبض الفتيس.
حالة كاوتش الأبواب: بص على كاوتش الأبواب والدواسات وقارنها بكام كيلو قطعتها العربية علشان تتأكد إن البياع أمين مش بيكدب عليك.
حط ايدك على ديل الشكمان واكتمه وشوف هل بينفث ولا سليم
2- بص ع العفشة والموتور
دور العربية بس ماتدوسش على البنزين وركز مع صوت الموتور هل طبيعي ولا في أي صوت خروشة أو برجلة.
شغل التكييف وشوف تأثيره على انتظام الموتور.
خلي حد يدوس بنزين وبص على عادم العربية وأتأكد هل لونه عادي ولا لون تاني.
حط ايدك على ديل الشكمان واكتمه وشوف هل بينفث ولا سليم.
اقف قدام الموتور وزود بنزين واتأكد من الموتور هل في أي آثار تسييل زيت على أي جزء ولو فيه فك الكفر بتاعه وبص تحته.
بص على بطن العربية واتأكد هل في رشح زيت من تحت؟ فلو الموتور مخدوش هيرشح زيت.
افتح مياه الرادياتير لما العربية تكون باردة واتأكد أن المياه خضراء ونقية ولا فيها صدأ أو عليها زيت ولو لاقيت كده ماتشتريش العربية.
طلع مقاس الزيت وبص على حالته خفيف محروق عادي لكن لو عليه مياه ماتشتريش العربية.
أمن عربيتك دلوقتي حتي لو مستعملة من خلال فايدتي وانت فى مكانك!
3- ركز مع الفتيس المانيوال
دوس دبرياج للآخر والمحرك شغال واسمع صوت الموتور اختلف ولا لا؟ هل في صوت شخللة زي لما يكون بدون دبرياج؟ لأن لو لاقيت أصوات بلاش تشتري العربية.
دوس دبرياج تاني علشان تتأكد من بلية الدبرياج وحاول تجرب كل الغيارات لما العربية تكون واقفة علشان تكتشف هل الغيارات بتتنقل بنعومة ولا لا.
شد فرامل اليد (الهاند بريك) وجرب الغيار الرابع وزود بنزين وحاول وقتها تطلع بيها لو طفيت تبقى مجموعة الدبرياج سليمة لكن لو فضلت دايرة فخلي بالك الدبرياج مفوت.
ودي شوية معلومات تانية محتاج تعرفها عن العربيات المستعملة، خطوات بيع أو شراء عربية مستعملة عشان ميضحكش عليك
