5 نصايح من ماما في عيد الأم زي الفصال والتوفير

في عيد الأم الكل بيفكر في الهدايا علشان يفرح ماما زي ما هي مفرحانه وماليه علينا الدينا، كل دا حلو لكن الأحلى كمان إننا نتعلم منها حاجات كتير في الحياة اليومية هتفرق معانا للأفضل.

هنقولك على شوية نصايح من الأمهات زي الفصال والتوفير والنظام هتساعدك قبل وبعد الجواز وهتخلي حاجات كتير حواليك أحلى، فكر فيها دلوقتي.

لو لسه ماجبتش هدية عيد الأم اعرف أكتر من هنا: هدايا عيد الأم حسب ميزانيتك: مش منها طقم الكوبايات

1- الفصال

هو الفصال عادة وحشة؟ طيب امتى أفاصل؟ وهل لازم أفاصل علشان أبان إني كسبت؟ بص هي مش خناقة لكن في أوقات كتير بتلاقي البياع بيأفور في الأسعار اللي بيقدمها فبيكون لازم تفاصل.

في بياعين تانيين بيحطوا يافطة زي "الفصال هواية جميلة من فضلك مارسها خارج المحل".. طيب ازاي أفاصل وأوصل لأفضل سعر من غير ما اوجع دماغي ده اللي هنقولك عليه، وازاي الأمهات شاطرين في الفصال؟

الفصال موضوع كبير تقدر تعرف عنه وتتعلم أكتر من نصايح الأمهات من هنا:5 نصايح في الفصال زي ما بتعمل الأمهات!

اتعلم من ماما زي ما بتعمل في مصروف البيت

2- التحويش والتوفير

شوف ماما بقالها سنين بتعرف تظبط مصروف البيت ازاي وكله بيبقى تمام، وبتعرف تمشي الدنيا بالقليل والكتير ودي الحكمة في التعامل مع الفلوس لازم تتعلم منها كدا وتكتسب خبرة.

كمان فكرة التحويش اللي ماما بتقولهالك من وأنت صغير لازم تعمل حساب للزمن وعند خيارات كتير أوي زي إنك تفتح حساب في البنك أو تستثمرها في مشروع أو على أقل تقدير خالص توفرها وتحوشها دا هيساعدك أوي.

3- صلاحية المنتجات

لما تيجي تشتري حاجة لازم تبص على تاريخ الصلاحية وتشتري على قدك علشان ما تلاقيش الحاجة دي ممكن تتركن عندك وتترمي في الاخر يبقى رميت فلوسها في الأرض.

4- اللبس الواسع شوية!

فاكر وأنت صغير وماما بتشتريلك لبسك كانت دايمًا تحب تجيبلك الحاجة الـ over size بتاعك علشان تنفعك بعد كدا وأنت كنت ممكن تضايق مع إن الموضوع أوقات كتير بيكون عملي فعلًا، مش لازم تعمل كدا في كل لبسك بس خلي الموضوع دا في دماغك.

عاوز تفرح ماما في عيد الأم ايه اللي ممكن تعمله؟ اعرف أكتر من هنا: 6 حاجات ممكن تعملها في عيد الأم علشان تفرح ماما

5- النظام

روق اوضتك واغسل كوبايتك والطبق اللي بتاكل فيه خد بنصيحة ماما وافتكر كلامها في عيد الأم.