6 جمل في قاموس الأم المصرية: زباينك من زمان ولازم تكرمنا!

بمناسبة عيد الأم تعالى نفتكر سوا ايه أشهر جمل الأم المصرية اللي بتتقال في قاموسها المالي، ونتعلم منها كمان الحكمة في التعامل مع الفلوس والتوفير زي مثلًا الفاكهة قبل ما تبوظ بتقولك دي مش بايظة دي مستوية وتتعمل عصير عادي يعني وبألف هنا.

أشهر جمل الأم المصرية في التعامل مع الفلوس

1- هات أحوشهملك 

ومين فينا ما اتقالوش الجملة دي؟ وأنت صغير لما تاخد العيدية ماما بتقولك تعالى أحوشهالك ومش بتعرف هي بتروح فين بالظبط بس أكيد بتدخل في مصاريف البيت يعني ولا ايه؟!.

2- احنا زباينك من زمان وأنت لازم تكرمنا 

لما تنزل تشتري حاجة مع ماما ممكن تدخل محل لأول مرة بس هي لازم تقول الجملة دي علشان التوفير والفصال وهي أشطر واحدة في الفصال أي رقم بيتقال ممكن تفاصل لأقل من نص السعر عادي خالص، والطريقة دي بتنفع في الاخر وياريتنا بنتعلم لما بنشتري لوحدنا!

اعرف أكتر من هنا: 5 نصايح في الفصال زي ما بتعمل الأمهات!

3- دي مش بايظة دي مستوية 

دي بقى أشهر جملة ممكن تقولها الأم المصرية قبل الفاكهة ماتبوظ، وعادي كله بيدخل الخلاط وبيتعمل عصير زي الفل والكل بيشرب وبينبسط، اوعى تفتكر إن الحاجة دي ممكن تترمي لا أبدًا النظرية المتعارف عليها "وجع بطني ولا رمي العصير"!

ربنا يخليلك ماما ماتنساش تقولها كل سنة وأنتي طيبة يا ست الكل في عيد الأم وتجيبلها هدية كمان اعرف أكتر من هنا: هدايا عيد الأم حسب ميزانيتك: مش منها طقم الكوبايات

4- امسك ايدك في الفلوس شوية 

لو فكرت تطلب دليفري أو تاكل برة أو بتشتري أي حاجة من برا عمومًا دايمًا نصيحة ماما ليك "مش كل يوم أكل من برة" وتلاقي المقارنات نازلة عليك بأكل البيت ومش هتخلص، بس هي عندها حق يعني كل في البيت ووفر وكمان أكل البيت بيكون صحي أكتر.

5- طبق الكشري دا بره بكام!

لما ماما مثلًا تعمل كشري وتقدملك طبقك وأنت بتاكل تقولك ايه رأيك كشري برا ولا الكشري بتاع أمك الأحلى، وبعدين الطبق دا برا بـ 40 جنيه أو بتقول أي رقم كبير علشان تفهمك أكتر إن أكل البيت أنضف وأوفر ودا الصح حقيقي.

6- ماتبينش إن الحاجة عجباك 

لما تنزل تشتري حاجة مع ماما وأنت صغير أو كبير عمومًا بيتقالك الجملة الشهيرة: لو الحاجة دي عجبتك ماتبينش كدا علشان البياع ما يغليش علينا السعر خلينا نعرف نفاصل براحتنا.