6 حاجات ممكن تعملها في عيد الأم علشان تفرح ماما
تاريخ النشر: 20 فبراير 2022 طرائف وعجائب
نضف الشقة مكانها النهاردة بس خلي بالك من المعطر!
خلاص عيد الأم قرب وكل واحد بيفكر ازاي يفرح ماما في اليوم دا بحاجة مختلفة، الهدية شئ أساسي بس لو ماعكش تجيب هدية أنت ممكن تفرحها بحاجات تانية كتير هتحسسها بالاهتمام والحب.
فكر تقعد معاها أطول وقت ممكن في 21 مارس وتشكرها على كل حاجة عملتها عشانك وتفتكروا حاجات كتير سوا وتضحكوا وتحسسها أد ايه كان ليها دور كبير أوي في اللي أنت وصلتله وهي ضحت علشانك كتير وتعبت وأنت مقدر دا.
تفتكر لو يوم عيد الأم فكرت تعمل حاجة مختلفة علشان تريحها ممكن تعمل ايه مثلًا؟!
لو لسه ماجبتش هدية عيد الأم هنقولك على أفكار كتير مناسبة لكل الميزانيات اعرف أكتر من هنا: هدايا عيد الأم حسب ميزانيتك: مش منها طقم الكوبايات
1- هات الحاجة من الدولاب بنفسك
عارف أنت لما تروح لماما وتقولها مثلًا مش لاقي التيشرت بتاعي فالرد المعروف للأم المصرية: طيب لو جيت وجبتهولك؟ وفعلًا بتجيب الحاجة دي وبتكون عارف مكانها كويس، حاول أنت في اليوم دا تجيب الحاجة بنفسك وتريحها.
2- هتتغدى ايه النهاردة؟
لو عاوز تريح ماما في يوم عيد الأم ممكن تعمل أنت الأكل بنفسك أو تجيب أكل من برا، وخليك فاكر كويس إنها الوحيدة تقريبًا اللي مهتمة دايمًا تسألك "هتتغدى ايه النهاردة؟" وبتعملك اللي بتحبه كتر خيرها.
3- الأطباق والغسيل
فكر تغسل المواعين ماكنها النهاردة وكمان الغسيل بس خلي بالك أحسن تستخدم كل مسحوق الغسيل وزيت الصابون وتبوظ الدنيا وتدمر مصروف الشهر كله.
لو مش معاك فلوس تجيب هدية لماما اعرف تعمل ايه من هنا: لو معكش تجيب هدية لماما في عيد الأم: الحاجة دي ببلاش!
خلي بالك وأنت بتستخدم الزيت!
4- خلي بالك من الزيت!
لو هتقلي حاجة أو هتستخدم الزيت فخلي بالك من الكمية اللي بتستخدمها وماتهدرش كتير، الزيت غالي، وزي ما هو معروف أهم حاجة عند ماما الزيت فمش عشان تفرحها تبهدل الدنيا.
5- روق الشقة بنفسك
فكر يوم عيد الأم تفرح ماما وتشارك في شغل البيت وتنضف وتروق الشقة بنفسك أو على الأقل اوضتك بس خلي بالك وأنت بتستخدم معطر الجو علشان ماما لو قفشتك وعرفت إنك خلصت كل المعطر مش هيحصل طيب فخليك حنين.
6- الفاكهة مستوية مش بايظة
اوعى تستغل الفرصة وترمي الفاكهة البايظة اللي في التلاجة وكأنك بتنضف لأن ماما لو مكانك كانت اعتبرتها فاكهة مستوية وهتتعمل أحلى عصير فعلًا.
اعرف أغاني عيد الأم من هنا: أشهر أغاني عيد الأم قديم وجديد: ابعتها لست الحبايب
