7 حقايق مالية مثيرة هتعرفها لأول مرة: وزن المليون دولار

معلومات كتير هتعرفها لأول مرة عن الفلوس زي المليون دولار وزنهم كام، وامتى الفلوس ماكنش ليها قيمة في ألمانيا وايه أغلى مبنى في العالم؟

1-   المليون دولار وزنهم كام؟

لما حطوا مليون دولار رزم من فئة 100$ يعني 10 آلاف ورقة كان وزنهم 10 كيلو جرام لكن لو المليون دولار بالسنت هيكون وزنهم 246 طن.

2-   الفلوس مالهاش قيمة في ألمانيا!

سنة 1923 الفلوس ماكنش ليها قيمة فعلية  في ألمانيا بسبب التضخم الكبير اللي حصل، والفلوس قيمتها بقت في الأرض لدرجة إنهم لصقوها على الحيطان بدل ورق الحائط وكمان كانوا بيدوها للأطفال يلعبوا بيها.

3-   أغلى مبنى في العالم

محطة الفضاء الدولية ISS تعتبر أغلى شئ تم بناءه بالعالم، واتبنت سنة 1998 بموجب تعاون دولي بقيادة أمريكا وروسيا وتمويل من كندا واليابان و 10 دول أوروبية.

وصلت تكلفتها لأكتر من 150 مليار دولار أمريكي، و ساهمت "ناسا" بحوالي 72.4 مليار دولار من التكلفة دي و روسيا بحوالي 12 مليار دولار، وأوروبا شاركت بحوالي 5 مليار دولار واليابان 5 مليار دولار و كندا حوالي 2 مليار دولار.

اقرأ أكتر عن تاريخ الفلوس الورقية من هنا: نبذة عن تاريخ الفلوس الورقية

ماك بتبيع أكتر من 75 برجر في الثانية

4-   ماكدونالز بيكسب كام في اليوم؟

ماك بتبيع أكتر من 75 برجر في الثانية، وبتكسب حوالي 75 مليون دولار في اليوم، وتُعتبر تاني أكبر شركة في العالم من حيث عدد الموظفين اللي بيوصل عددهم لـ 1.7 مليون موظف.

5-   صناعة لعبة مونوبولي

دي لعبة شبه بنك الحظ وبيتم طباعة أوراقها الخاصة من المال الحقيقي سنويًا، أمريكا بتطبع حوالي 974 مليون دولار من الأوراق النقدية سنويًا، واللعبة دي بيتطبع لها 30 مليار دولار من الأوراق النقدية الخاصة بيها.

6-   الأوراق النقدية المميتة

تفتكر مين أنضف مقعد المرحاض ولا الأوراق النقدية؟! اكتشفوا إن 90% من الأوراق النقدية المتداولة في أمريكا عليها آثار الكوكايين وممكن تحمل فيروس الأنفلونزا لأكتر من أسبوعين علشان كدا لازم تغسل ايدك دايمًا بعد ما تمسك الفلوس.

7-   الحواف على العملة المعدنية

الحواف اللي بتكون موجودة على أطراف العملة المعدنية مش علشان الملمس أو الزينة لأن دورها الأساسي منع التزوير.

بمناسبة الكلام عن الفلوس لو معاك فلوس قديمة تستغلها ازاي من هنا: ازاي تكسب من الفلوس النادرة ومين بيقبل الفلوس المقطعة؟