7 مسلسلات رمضانية كان موضوعها الاساسي البحث عن الفلوس

اعلانات مسلسلات رمضان نزلت خلاص، فـ خلينا نفتكر شوية مسلسلات اتعرضت في رمضان كان موضوعها الأساسي البحث عن الفلوس أي ان كان نوعها، ميراث أو سرقة، أو نصب، المهم انهم قضوا 30 حلقة بيدوروا فيها علي الفلوس.

مسلسلات الميراث:

نيللي وشريهان

بنات عم بيدوروا علي ميراثهم من جدهم عشان ينقذهم من الافلاس بس كل شوية يقف قدامهم لغز جديد لميكي وتظهر معاه شخصيات مختلفة، والحمدلله في الاخر بيوصلوا للثروة كاملة.

الوصية

مليونير بيموت ويسيب وراه وصية لـ 3 أشخاص منهم ابنه، عايز يكفر بيها عن ذنبه في هدم دار ايتام بأنه يحقق ليهم حلم، وهدفه كمان أن ميراثه يوصل لبنته الحقيقة، وبرضه في الاخر كل اللي ليه فلوس في الوصية بيأخد حقه.

أبطال المسلسلات دي  قضوا 30 حلقة بيدوروا فيها علي الفلوس

السبع وصايا

الموضوع باين من اسمه، 7 اخوات قتلوا ابوهم وجثته اختفت بعدها، وعشان يوصلوا للميراث لازم يعملوا الـ 7 وصايا اللي ابوهم سايبها.

العار

عيلة من أولاد كتير بمناصب عالية بعد موت والدهم بيكتشفوا انه تاجر مخدرات، وبعد ما كان مشغل معاه واحد بس من أولاده، بيضطروا كلهم يتاجروا مع أخوهم عشان يأخدوا الميراث بس نأبهم بيجي علي شونة وبيخسروا كل حاجة.

البرنس

دي بقي عيلة مفترية، بعد ما أبوهم فضل البرنس محمد رمضان عنهم، قرروا ينتقموا منه ويخلصوا من مراته وولاده عشان يأخدوا حقهم، بس في الأخر طبعا بيرجع وينتقم ويأخد حقه.

مسلسلات النصب والسرقة:

الواد سيد الشحات

المسلسل ده أكبر دليل علي ان الطيبة مش دايما مفيدة، لأن سيد لما رفض يأخد من الفلوس اللي معزته لاقتها، اخواته وابوه سرقوها وفي الاخر لاقي نفسه مضطر يدفع تمن اخطاء عيلته كلها، ومقدرش يجمع الفلوس لرئيس العصابة صاحب الفلوس الأصلي.

بـ 100 وش

دول بقي عصابة نصب تدخل قلبك من حلقتين وفجأة بتلاقي نفسك بتدعيلهم ربنا يوفقهم في خطتهم الجديدة ويبعد عنهم عين البوليس.