الحق واشترى ارض فى الزمالك بـ 40 جنيه بس على الـ Next Earth!

زي ما كنا بنسمع زمان جملة "الارض دى اتعرضت عليا زمان برخص التراب ورفضتها" دي تعتبر فرصة جديدة ليك تعوض كل ده وتشتري الأرض اللي نفسك فيها وبأسعار مناسبة ومعقولة، وبعد كده كل فترة الأرض اللي بتشتريها على حسب أهميتها وموقعها بيبدأ سعرها يغلى والناس تزايد على سعرها وبكده تقدر تحقق مكاسب من مجرد أرض افتراضية!

في الـ Next Earth كمان بيكون عندك الامكانية انك تأجر الأرض بس أو تفضل محتفظ بيها وتكبرها كل فترة وبكده العائد هيكون أكبر لما تفكر تبيعها أو تأجرها، ده غير انك تقدر تعرض على أرضك أي نوع من الرسومات أو الاعلانات عشان تزود من قيمتها، كل اللي عليك انك تدور على مناطق سياحية او اماكن مشهورة بيدور عليها الناس.

اعرف أكتر من هنا عن اجدد ابتكار في عالم الـ NFT أرض الواقع الافتراضي Next Earth!

أغلى البلاد على Next Earth

1- الفاتيكان بسعر 45.054 دولار للوحدة المربعة

2- موناكو بسعر 20.969 دولار للوحدة المربعة

3- جبل طارق بسعر 9.467 دولار للوحدة المربعة

عيوب الموقع

زي ما أي استثمار فيه جزء من المخاطرة، كمان موضوع الـ Next Earth فيه بعض الحاجات اللي محتاج تفكر فيها زي مثلاً ان ملكيتك للأرض دي مش معناه أبدأً انك بتمتلك الأرض دي في الحقيقة أو حتى ليك فيها أي نصيب، وبالتالي مفيش أي اوراق أو اثباتات لملكيتك للأرض دي غير ان بيظهر لباقي المستخدمين أن الأرض دي ملكك وماينفعش حد يشتريها من الموقع، فـ ممكن في أي وقت يظهر موقع اجدد ومتطور أكتر والناس تتنقل عليه والموقع ده ميبقاش له أي قيمة، وده اللي موجود بالفعل بس في بعض الألعاب الأونلاين اللي تقدر تمتلك فيها أماكن أو مناطق، بس لغاية دلوقتي لسه محدش عمل موقع بنفس تفاصيل خريطة العالم زي Next Earth.

ازاي تشتري أرض في الـ Next Earth

الموضوع بسيط جدا، بتدخل على موقع Next Earth وتضغط على Buy Land عشان تظهر لك الخريطة وتقدر تعمل بحث فيها عن أي مكان انت عايز تشوفه.

 طبعاً الأسعار قليلة جداً وبتزيد مع الوقت حسب أهمية الأرض وعدد الناس اللي عايزة تشتريها منك، بعد كده لما بتقرر تشتري بتختار بين 4 محافظ إلكترونية، ودول اللي بيتعامل بيهم الموقع وبتشتري فيهم Coins أو عملات افتراضية سعر العملة يساوي 1 دولار، بعد اختيارك للمحفظة بتتم عملية الشراء وكده بتكون امتلكت الأرض دي.

الأراضي في مصر 
 

احنا جربنا نشتري أرض في منطقة الزمالك، وكانت مكونة من 4 وحدات ومبني عليها عمارة، فـ سعر الوحدة كان 0.65 دولار ومجموع سعر الأرض كلها يساوي 2.6 دولار يعني تقريباً 40.90 جنيه مصري.