إيه اللي بيحصل لما بنك بيتباع؟

في بعض الأحيان، البنوك بتتباع لبنوك تانية، أو بيتم دمجها مع بنوك تانية، وممكن يكون الموضوع ده مربك شوية للعملاء، ولكن في حاجات البنك لا يمكن يغيرها، وفي حاجات تانية ممكن هيحصل فيها تغييرات.

إيه اللي بيحصل للشهادات والودايع والقروض الموجودة من الأول؟

ما فيش تغييرات بتحصل للعقود الممضية من الأول، وده بيشمل الشهادات والودايع والقروض القديمة اللي البنك القديم اتفق عليها من الأول، فالمسئولية اللي على البنك القديم بتتنقل للبنك الجديد بنفس الشروط والقواعد اللي اتفق مع العملاء عليها، وده بيشمل الفايدة والرسوم والغرامات وهكذا، فالقسط اللي بتدفعه أو العائد اللي بيجيلك مش هيتغير.

ولكن لازم تخلي بالك إن الشهادات والودايع بيتم تجديدها تلقائي، وفي حالة التجديد، هينطبق عليها أي تغييرات البنك عملها، وعشان كدة لو أنت مش عايز تجدد، يبقى لازم تخطر البنك بإنك عايز تسترد فلوسك لما مدة الشهادة أو الوديعة تخلص على الأقل شهرين قبل ميعاد الاستحقاق.

لو أنت كنت ناوي تقدم على قرض أو تحط فلوسك في شهادة في البنك القديم، يبقى أحسن لك إنك تستنى شوية وتشوف إيه نوع التغييرات اللي هتحصل وتدرس إن كان ده البنك الأفضل بالنسبة لك ولا أحسن إنك تشوف بنك تاني

طيب بالنسبة للشهادات والقروض والودايع الجديدة؟

البنك الجديد ممكن يقرر إنه يغير شوية في المنتجات المتاحة للعملاء، فممكن يشيل نوع قروض أو شهادات، أو ممكن يغير الرسوم اللي البنك ياخدها أو حتى يقرر تغيير نسبة الفايدة المتاحة على المنتجات، عشان كدة لو أنت كنت ناوي تقدم على قرض أو تحط فلوسك في شهادة في البنك القديم، يبقى أحسن لك إنك تستنى شوية وتشوف إيه نوع التغييرات اللي هتحصل وتدرس إن كان ده البنك الأفضل بالنسبة لك ولا أحسن إنك تشوف بنك تاني.

لو عندك حسابات في البنكين اللي اندمجوا، إيه اللي هيحصل؟

ممكن البنك يقرر دمج الحسابات مع بعض، ولو أنت مش عايز كدة، ممكن تغير نوع واحد من الحسابات أو تنقل حساب فيهم لبنك تاني.