5 أنواع للبنوك في مصر اعرفهم دلوقتي
تاريخ النشر: 22 نوفمبر 2020 عالم المال
سعر الفايدة فى مصر مش ثابت بس هنقولك تعمل ايه
البنوك ببساطة عبارة عن وسيط بين الناس اللي معاهم فلوس وعايزين يستثمروها بشكل آمن أو حتى لو عاوزين بس يحوّشوها فبياخدها منهم وفي المقابل البنك بيديهم نسبة فايدة على المبلغ كل مُدة وبيدي الفلوس دي لناس تانية عايزين يعملوا مشاريع أو استثمارات بس مفيش معاهم فلوس أو سيولة تكفي وفي المقابل بيخليهم يردوا المبلغ اللي أخدوه وعليه نسبة فايدة معينة وبتتحدد الفايدة دي حسب حاجات كتير منها: المبلغ والمدة ودورية الدفع.
والبنوك بتتقسم لأنواع حسب طبيعة نشاطها اللي بيكون جنب النشاط الأساسي بتاعها اللي احنا عارفينه:
(بس كتير بنسمع عن البنك الزراعي أو الإجتماعي مثلاً ومابنعرفش يعني ايه المختلف فيهم عن البنك العادي ؟)
البنوك المركزية
وده بيكون أساس النظام المصرفي في الدولة وهدفه الأساسي تحقيق التوازن الاقتصادي للدولة على عكس باقي البنوك اللي بيكون هدفها الربح وهو اللي بيحدد سعر الفايدة على القروض والودائع كل فترة وكمان هو اللي بيطبع الفلوس اللي بنستخدمها، وممكن تعرف اكتر عن البنك المركزي ووظيفته إيه من (هنا).
البنوك التجارية
وهي البنوك اللي بتقوم بأعمال مصرفية زي استثمار فلوس الناس (في صورة ودائع أو شهادات أو حسابات توفير) في تمويل المشروعات بكل أنواعها وتقديم القروض وصرف الشيكات وممكن كمان يقوم بأعمال غير مصرفية زي المشاركة في المشاريع الاقتصادية وتقديم الاستشارات المالية.
كتير بنسمع عن البنك الزراعي أو الإجتماعي مثلاً ومابنعرفش يعني ايه المختلف فيهم عن البنك العادي ؟
بنوك الاستثمار
ودي بنوك بتتعامل بشكل أساسي مع المستثمرين والشركات عن طريق الأوراق المالية (الأسهم والسندات) وبتساعد الشركات على طرح أسهمها في البورصة وبتقدم القروض لفترات طويلة للمشروعات الكبيرة بغرض الاستثمار والمساهمة.
بمناسبة كلامنا عن الاستثمار اتعل حاجة جديدة دلوقتي واعرف عنها أكتر من هنا: ايه هو الاستثمار العقاري؟ وازاي تستثمر فلوسك في العقارات؟
البنوك المتخصصة
وهي البنوك اللي بتقوم بالعمليات المصرفية لكن هدفها الأساسي تمويل وتنمية نشاط محدد وبيكون فيها قروض بفوايد أقل أو بتسهيلات في السداد لأي حاجه تخص النشاط ده زي: البنوك العقارية والبنوك الزراعية والبنوك الصناعية.
البنوك الإسلامية
وهي باختصار بنوك بتتعامل وفق أحكام الشريعة الإسلامية فمثلاً في حوار القروض والودائع مابتعتمدش على وجود نسبة فايدة ثابتة لكن بتكون متغيرة حسب أحوال السوق، وبيكون للعمليات المصرفية أسماء مختلفة زي المرابحة والمضاربة والتوريق وممكن تعرف عن التمويل الإسلامي أكتر من هنا.
