اجدد ابتكار في عالم الـ NFT أرض الواقع الافتراضي Next Earth!

مؤخرا بقينا بنسمع كتير عن الـ NFT وهي اختصار للـ Non Fungible Tokens أو الرموز غير قابلة للاستبدال وهي عبارة عن نوع من الأصول المشفرة بتسمح لك بامتلاك أصل رقمي زي صورة فنية أو فيديو أو أغنية أو أي حاجة ممكن تيجي في بالك، وشراء الأصول دي قائم على عملة الإيثريوم، بس المهم هنا ان الحاجة دي انت بتمتلكها في الواقع الافتراضي وبس، يعني غير ملموسة وماتقدرش تحصل عليها في الواقع، زي مثلاَ لما جاك دورسي الرئيس التنفيذي لشركة Twitter أعلن عن بيعه لأول تغريدة له على تويتر اللي تم نشرها في 2006 كـ NFT مقابل 1630.58 إيثر، وده يعادل حوالي 2.9 مليون دولار حسب سعر العملة وقت البيع.

الـ Next Earth خطوة جديدة
 

الأهم من مجرد الأعمال الفنية أو الموسيقى هو انك دلوقتي بقيت تقدر تشتري قطعة أرض افتراضية، زي ما بيحصل دلوقتي في موقع Next Earth وهو عبارة عن خريطة طبق الأصل لخريطة العالم دلوقتي بكل تفاصيلها بس تقدر تشتري عليها أي قطعة أرض تعجبك، حابب تشتري أرض في البلد اللي بتحبها، عايز تشتري الأرض اللي كان نفسك فيها، أو حتى ممكن تشتري أماكن فيها معالم سياحية زي الأهرامات، كله متاح قدامك وكل أرض وليها سعرها.

إيه هو الـ Next Earth؟

هو أول منصة لامتلاك الأراضي بشكل افتراضي (Metaverse) مبني على خريطة الأرض الحقيقية، تقدر من خلاله تقدر تشوف  خريطة العالم بشكل دقيق جداً كأنك في Google maps، وبعد كده تقدر تختار أي مكان على سطح الأرض وتمتلكه بشكل افتراضي على هيئة NFT، وهتلاقي اراضي كتير ملك ناس تانيين في كل مكان، تقدر تشتريها بالسعر المعروض أو عن طريق مزاد بتدخله انت ومشترين تانيين وصاحب الأرض بيبيع عند السعر اللي يناسبه، وانت كمان تقدر تعمل كده بعد ما تشتري أي أرض، وده يتوقف على ميزة المكان بالنسبة للمشتري.

اعرف من هنا ازاي تشترى ارض فى الزمالك بـ 40 جنيه بس على الـ Next Earth!