ازاي خبز البطاطا هيوفر مليون طن قمح سنويًا في مصر؟

خبز البطاطا من أكتر الكلمات اللي المصريين كانوا يبحثوا عنها في جوجل الساعات الأخيرة، فايدتي هتقولك معلومات أكتر عن خبز البطاطا والفرق بينه وبين خبز القمح وازاي هيوفر على مصر مليون طن قمح سنويًا.

من 20 سنة فاتت في باحث مصري اسمه "عبدالمنعم الجندي" قدم فكرة مختلفة لصناعة رغيف العيش، وبالفعل السنة اللي فاتت محافظة الوادي الجديد، تحديدًا في شهر رمضان، طبقت الفكرة ودخلت صنف خبز البطاطا الجديد "جنداوي" في إنتاج رغيف العيش.

حلول مشكلة القمح في مصر

محافظ الوادي الجديد محمد الزملوط، خلال اجتماعه مع وزير التموين والتجارة الداخلية في مصر علي مصيلحي، قال إن حلول أزمة القمح موجودة وبجودة عالية وبمواصفات مميزة.

وحسب كلامه، مصر جادة الفترة الجاية في استخدام التركيبة الوراثية الجديدة من البطاطا المطحونة في إنتاج الخبز، ودا هيوفر على مصر مليون طن في السنة الواحدة.

مميزات خبز البطاطا

• مشبع ويحتوي على كميات سكر أقل وطعمه مش مختلف عن خبز القمح.
• البطاطا اللي هتدخل في إنتاج الخبز تم زيادة نسبة المادة الجافة فيها بحوالي 26 % بعدما كانت 11 % في الأصناف المصرية.
• هيكون في مميزات للمزارعين، وإنتاجية الفدان هتكون كبيرة وبتوصل لـ 20طن للفدان الواحد ودا بيعادل 10 أفدنة مميزة من إنتاج القمح.

اقرأ كمان: سعر العيش السياحي والفينو بعد قرار مجلس الوزراء

ازاي خبز البطاطا بيتعمل؟

• يتم سلق البطاطا وخلطها مباشرة مع دقيق القمح.
• بيتم توفير كمية من مياه العجن لوجودها في البطاطا المسلوقة.
• بعد ما بيتم حصاد البطاطا بتتغسل كويس جدًا وتتسلق وتتحط جوا عبوات مختلفة تنقل إلى الأفران مباشرة أو مجمده بالعبوات الخاصة بها.
• وبعد كدا بتتعجن بالطريقة العادية وبيخرج رغيف عيش جودته عالية وطعمه حلو.

شوف خبز البطاطا.. فكرة جديدة لإنتاج الخبز وتوفير فاتورة استيراد القمح من هنا

تكلفة سعر رغيف الخبز المكون من القمح

رئيس شعبة المخابز بغرفة القاهرة التجارية "عطية حماد" قال إن خبز البطاطا فكرة مميزة وليها أبعاد اقتصادية كبيرة، ومن بينها خفض تكلفة سعر رغيف الخبز المكون من القمح.

علاج للمشكلة

حماد قال إن من أكبر المشاكل اللي بتواجهها مصر في صناعة رغيف الخبز إن تكلفته بتوصل لـ 80 قرض وبيتم بيعه للمواطن بـ 5 قروش بعد الدعم، ودا بيحمل الدولة فوق طاقتها.