لبنان هتعمل ايه بعد إعلان إفلاسها؟

لبنان أعلنت النهاردة، الاثنين، إفلاس الدولة رسميًا ومصرف لبنان المركزي، وقال نائب الحكومة اللبنانية إنه هيتم توزيع الخسائر على الدولة ومصرف لبنان والمصارف والمودعين.

وأضاف نائب رئيس الحكومة اللبنانية إنه لا توجد نسبة مئوية محددة بخصوص عملية توزيع الخسائر بعد ما تم الإعلان رسميًا عن إفلاس الدولة والمصرف المركزي، والسبب في الخسارة هي سياسات طويلة استمرت لسنين.

ايه الحل في إفلاس لبنان والمصرف المركزي؟

والمسئول تابع كلامه في تصريحات تليفزيونية محلية وقال إن الطريق اللي بيمكن اتباعها لحل الأزمة، عمل مفاوضات مع صندوق النقد الدولي، مؤكدًا إن المفاوضات دي أحرزت تقدم كبير. 

والمفاوضات اللبنانية دي مع صندوق النقد الدولي، بتناقش قطاعات مختلفة وهي السياسة المالية المتزنة وإصلاح القطاع المصرفي مع إعادة هيكلته، بالإضافة إلى إصلاح القطاع العام والكهرباء،  ومعالجة التضخم، وتوحيد سعر الصرف.

جرد في مصرف لبنان

حاليًا شركة "كي بي إم جي" بتعمل بتدقيق مصرف لبنان، ومصرف لبنان يتولي حاليًا عمليات جرد لكميات الذهب اللي بحوزته.

يعني ايه إفلاس الدولة؟

إفلاس الدولة يعني عجز الدولة عن سداد ديونها أو الحصول على الأموال من الجهات الخارجية لدفع أثمان ما تستورده من بضائع وسلع، وبلغة الاقتصاد إفلاس الدول اسمه "الأزمة في ميزان المدفوعات".

وطبعًا لما بيحصل إفلاس للدولة عملتها بتنهار ونظامها البنكي ودا بيترتب عليه مشاكل اقتصادية ضخمة، ولازم الدولة تدور على مخرج قانوني علشان تنقذ ما يمكن إنقاذه من مستحقات الغير.

وفي الحالة دي الدولة بعد ما بتفلس بتروح لصندوق النقد الدولي أو إلى الدول الأخرى لاقتراض المبالغ الضرورية، لأنها لو معرفتش تعمل كدا مش هتقدر تستورد السلع والخدمات الضرورية.

الاقتراض من دول تانية

بعد ما الدولة بتعلن إفلاسها، زي ما حصل مع لبنان، بتقدر تقترض من دول تانية لو مقدرتش تاخد فلوس من صندوق النقد الدولي لأن الصندوق بيفرض سياسات اقتصادية ونقدية معينة صعبة.