ليه الناس ما بتحبش تتكلم عن الفلوس؟
تاريخ النشر: 03 أكتوبر 2020 عالم المال
علاقة الناس بالفلوس أعمق مما تتصور.
الكلام عن الفلوس دايماً بيعتبر عيب، وفي ناس كتير بتحس إن موضوع الفلوس ده موضوع غريب وغير مريح، وأكيد كلنا بنتعرض لمواقف بنضطر ننقاش فيها الفلوس، وممكن ساعتها تلاقي نفسك مش مرتاح إنك تتكلم في الموضوع، بس هو إيه السبب؟ وإزاي الموضوع ده ابتدى؟
إزاي الموضوع ابتدى؟
فكرة إن الكلام عن الفلوس حاجة عيب هي عادة مجتمعية ابتدت عن طريق الأغنياء واتصدرت لباقي العالم، يُقال إن الإنجليز هم اللي ابتدوا الموضوع ده، والفكرة إن الناس الأغنياء مش محتاجين يتكلموا عن الفلوس لإنهم عندهم ناس بيديروا أموالهم وغير إن ساعات الناس ما بتبقاش عايزة تبين هم أغنياء أد إيه، وعشان كدة الموضوع بقى غير مريح أو غريب، ولكن في بلاد تانية زي هولندا، الكلام فيها عن الفلوس مش غريب ولا عيب.
يُقال إن الإنجليز هم اللي ابتدوا الموضوع ده، والفكرة إن الناس الأغنياء مش محتاجين يتكلموا عن الفلوس لإنهم عندهم ناس بيديروا أموالهم وغير إن ساعات الناس ما بتبقاش عايزة تبين هم أغنياء أد إيه
هل الموضوع ده مفيد؟
لا، لإن الموضوع تطور من حاجة عيب أو غريبة وبقى طريقة الناس بتستخدمها عشان تستغل ناس تانية أو عشان تمنع عنهم المعرفة، وتخليهم غير مدركين لحقوقهم، وده بيحصل كتير مع الستات خصوصاً واللي معروف إنهم بيبقوا غالباً مش متعودين إنهم يتكلموا عن الفلوس بسبب إن المجتمع بيصف الكلام عن الفلوس كحاجة همجية أو ذكورية، وبالتالي في ستات كتير بيتم دفع مرتبات قليلة ليهم بالمقارنة بزمايلهم الرجالة بسبب عدم قدرتهم على مناقشة مرتباتهم.
إزاي تقدر تتناقش في الفلوس؟
1. لاقي الوقت المناسب، يعني ما ينفعش تتناقش في المرتب كأول حاجة في مقابلة شغل مثلاً، ولكن حقك تسأل في آخر المقابلة.
2. اعرف أنت عايز تتكلم عن إيه بالضبط، لو أنت بتناقش إيجار مثلاً، يبقى لازم ترتب أمورك، وتعرف البيوت أو الشقق اللي حواليك بتتأجر بكام.
