ليه لاعيبة الكورة بيقبضوا ملايين؟: السر فيك أنت!

واحنا صغيرين معظمنا كان عاوز يطلع لاعب كرة مشهور ويبقى ميسي أو رونالدو زمانه والأحلام دايمًا بتزيد لما الفرعون المصري محمد صلاح قدر يحقق نجاحات كتير في الاحتراف وبقى واحد من أحسن لاعبي العالم.

لاعب الكرة بيقبض ملايين ليه؟ دا يمكن السؤال اللي بييجي في بالنا طول الوقت ايه السبب ودورة راس المال دي بتجي منين، هتعرف دلوقتي كل حاجة وهتكتشف إن أنت  وأنا السبب في نجاح الصناعة دي.

اللعبة الشعبية الأهم في العالم

كرة القدم تُعتبر اللعبة الشعبية الأهم في العالم واللي بيتابعها أكتر من 4 مليار شخص في الكرة الأرضية كلها، وناس كتير جدًا بتتفرج على الماتشات ودا بيزود من الدعاية والإعلان زي الفواصل الإعلانية مثلًا.

كمان في ناس كتير مستهلكين لمنتجات كرة القدم زي التيشرتات والكور وغيرها من المستلزمات الرياضية، وناس كتير برضو بتشتري تذاكر الفريق اللي بتشجعه وكمان لو متعرفش خلينا نقولك إن في مقامرين بيلعبوا قمار على نتايج ماتشات كرة القدم.

كل الأسباب دي تخلي صناعة كرة القدم من أفضل الاستثمارات في العالم اللي رجال الأعمال عينيهم بتروح عليها علطول، والسبب الوحيد والأساسي لمصادر الربح دي كلها الـ 4 مليار اللي بيتابعوا كرة القدم.

بمناسبة كلامنا عن الكورة ماتنساش إن مصر هتلعب ماتشين مهمين في مارس اعرف أكتر من هنا: تاريخ مواجهات مصر والسنغال: اتقابلوا 14 مرة

ملايين كرة القدم

أما عن مصادر ملايين كرة القدم اللي بنشوفها في الرواتب الجنونية دي سببها:

• عقود الرعاية.
• بيع حقوق بث المباريات: طب أنت عارف  إن قناة "بي إن سبورت" دفعت 412 مليون دولار لكل موسم علشان تشتري حقوق بث مباريات دوري أبطال أوروبا.
• الإعلانات والدعاية.
• زي ما قلنا قبل كدا اهتمام رجال الأعمال بكرة القدم لأنه بيزنس مضمون وفلوسه حلوة.

كل العوامل دي بتساعد الأندية إنها تطور من نفسها في الصفقات والرواتب وإنها تنافس بشكل حقيقي وتحقق أهدافها.

أرقام خيالية

• على سبيل المثال: دفعت شبكة سكاي سنة 2007 مبلغ 1.7 مليار جنيه علشان تحصل على حقوق بث الدوري لـ 5 سنوات.
• شركة طيران الإمارات دفعت 100 مليون جنيه لمدة 15 سنة، علشان تسمي ملعب أرسنال الجديد باسم ملعب الإمارات.
• دا طبعًا غير صفقات شراء اللاعيبة ورواتبهم كلها أرقام خيالية وفي زيادة دايمًا.

الفرق بين كرة القدم زمان ودلوقتي

زمن ماكنش ليها شعبية كبيرة أوي يعني في بداية انتشار كرة القدم ماكنش في حد بيمارس الرياضة دي علشان يحقق فلوس بالعكس دي كانت الأندية بتاخد فلوس من اللاعيبة علشان التيشرتات.

وكان اللي بيلعب اللعبة دي عمال المصانع وطلاب المدارس لكن دلوقتي شعبية اللعبة اختلفت في العالم كله وبقت استثمار كبير جدًا والمتابعين بتوع اللعبة في العالم كتير جدًا ودا بيحرك الاستثمارات وبيجيب ملايين.