مبادرة البنك المركزى للتمويل العقارى مارس 2021

تحت شعار "شقة بسعر الايجار" الرئيس عبد الفتاح السيسي أصدر مبادرة جديدة للتمويل العقاري عن طريق البنك المركزي، المبادرة أفضل بكتير من اللي قبلها اللي بدأت في نوفمبر 2020 لأنها بتخفف العبء عن المواطن اللي محتاج شقة لكن فلوسها مش جاهزة معاه دلوقتي، وده غير أنها هتساعد في انتعاش حركة بيع وشراء الوحدات السكنية، فـ لو عندك شقة وعايز تبيعها جهّز أوراقها كلها عشان البنك يقبلها بسرعة.

التمويل العقاري الجديد،

ايه الجديد في المبادرة دي عن اللي قبلها؟

• سعر الفايدة 3% متناقصة، يعني تقريباً 1% ثابتة، بدل 8% في المبادرة القديمة.
• هتقدر تسدد في مدة بتوصل لـ 30 سنة، بدل 20 سنة في الأولى.

ممكن تعرف أكتر عن المبادرة القديمة من هنا، ازاي تقدم على مبادرة البنك المركزي للتمويل العقاري؟

شروط التمويل العقاري،

الشروط المطلوبة في المتقدم:

• الدخل الشهري لفئة محدودي الدخل لازم يكون 4,500 جنيه مصري أو أقل.
• الدخل الشهري لفئة متوسطي الدخل هو 10,000 جنيه مصري أو أقل.
• مش لازم تكون موظف، ممكن تكون صاحب عمل حر.
• ماتكونش استفدت قبل كده بأي مبادرة تمويل عقاري.
• الـ i-score بتاعك يكون مظبوط.
• يكون معاك 20% من تمن الوحدة السكنية اللي محتاجها.

شروط شقق التمويل العقاري

الشروط المطلوبة في الشقة اللي هتختارها:

• لو كنت من محدودي الدخل فـ عندك الامكانية تختار شقة سعرها في حدود 350,000 جنيه.
• أما لو انت من متوسطي الدخل فـ عندك الامكانية تختار شقة سعرها في حدود مليون جنيه.
• ماينفعش تستغل المبادرة في تمويل السكن السياحي، زي المصايف مثلاً.
• لازم الوحدة السكنية تكون مسجلة، ومفيش عليها مخالفات.
• كمان لازم تكون متشطبة وجاهزة للمعيشة.
• لو انت اللى هتبيع الشقة اتأكد ان كل أوراق التسجيل جاهزة ومفيش على وحدتك أي مخالفات.

أول خطوة للتقديم أنك هتروح مقر صندوق الإسكان الاجتماعي وتقدم كل الملفات الخاصة بالوحدة 

الأوراق المطلوبة للحصول على شقة ضمن مبادرة التمويل العقاري:

لو موظف هتجيب:

• صورة البطاقة
• مفردات مرتب معتمدة من جهة العمل.
• تعهد من جهة العمل بتحويل المرتب للبنك اللي هيمول الشقة.
• كشف حساب بنكي لمدة 6 شهور.
• لو متجوز جهز صورة قسيمة الجواز.
• عقد تمليك أو ايجار المكان اللي ساكن فيه دلوقتي.

لو صاحب عمل حر هتجيب:

• صورة البطاقة
• شهادة من محاسب قانوني تحدد الدخل السنوي أو الشهري.
• البطاقة الضريبية و مستخرج السجل التجاري.
• لو متجوز جهز صورة قسيمة الجواز.
• عقد إيجار أو تمليك المكان اللي ساكن فيه دلوقتي.

خطوات التقديم في مبادرة التمويل العقاري

1- هتروح مقر صندوق الإسكان الاجتماعي وتقدم كل الملفات الخاصة بالوحدة عشان تتحمل على النظام الخاص بالصندوق.

2- بعد كده الصندوق هيبعت يستعلم عن الوحدة ومحل إقامتك وطبيعة عملك.

3- بعد الموافقة، الصندوق هيتواصل معاك عشان تعرف نظام الدفع وتستكمل البيانات.

4- هتروح البنك الخاص بيك عشان تمضي العقود الثلاثية، بحيث هيكون مالك الشقة طرف أول بائع وانت طرف تاني مشتري وجهة التمويل طرف تالت ممول للوحدة السكنية. ومبروك عليك الشقة!