5 حاسبات اونلاين محتاج تستخدمها مرة في الشهر!

مين فينا مبيعملش حساباته أول كل شهر، ومين فينا مش بيتلخبط! بسبب الحسابات دي فايدتي عملت حاسبات أونلاين هتحتاج تستخدمها مرة في الشهر على الأقل هتسهل عليك حاجات كتير.

1- حاسبة تقسيم الفواتير في المطاعم

مع الآلة الحاسبة دي هتعرف تحسب أي فاتورة بالبقشيش بتاعها وتقسمها على أصحابك لو بتحب تخرج معاهم وبتقعوا في نفس المشكلة كل مرة وقت الحساب، "ازاى نقسم الفاتورة و هنسيب بقشيش كام؟".

اعرف استهلاكك للكهرباء وتوقع فاتورتك الشهرية هتبقى كام مع الآلة الحاسبة

2- حاسبة فواتير الكهرباء الشهرية

اعرف استهلاكك للكهرباء وتوقع فاتورتك الشهرية هتبقى كام مع الآلة الحاسبة دي اللي بتحسبلك كمية الاستهلاك بالكيلو وات، وقيمة الفاتورة مش بتشمل رسوم النظافة أو الدمغات.

3- حاسبة الميزانية الشهرية اونلاين

هتعرف تفصل ميزانية شهرية تناسب كل التزاماتك، وهتعرف فلوسك رايحة فين كل شهر، وهتحط خطة شهرية لسداد ديونك، وهتزود المبلغ اللي بتحوشه عشان تلبي أهدافك المالية على المدى الطويل، وده هيديلك فرصة تعرف إذا كنت محتاج تزود دخلك.

4- حاسبة فوائد بطاقة الائتمان اونلاين

عندك بطاقة الائتمان/ فيزا المشتريات وملحقتش تدفع القسط اللي عليك قبل انتهاء فترة السماح اللي بتكون ما بين 45 و58 يوم، يبقي هينزل علي المبلغ فايدة يومية؛ استخدام حاسبة الفوائد عشان تعرف المبلغ الكلي اللي محتاج تدفعه.

5- حاسبة ضريبة العقارات

عندك شقة ومحتاج تحسب الضريبة العقارية السنوية عليها، يبقى لازم تعرف أن لو شقتك هي وحدتك الأولي وتمنها أقل من 2 مليون مفيش عليها ضريبة، ده غير أن الضريبة على الوحدة السكنية بتختلف عن مبلغ الضريبة على الشقق الغير سكنية.

لما تستخدم الآلة الحاسبة دي هتعرف مبلغ الضريبة اللي محتاج تدفعه على شقتك أي إن كانت وحدتك الأولى أو التانية.