8 طرق علشان تفرق بين الفلوس الأصلية والمزورة!

الفلوس المزورة بتأثر على الاقتصاد بالسلب، وكمان كتير أوي من المواطنين مش بيعرفوا يفرقوا بينها وبين الفلوس الأصلية، لكن خلينا نقولك إن أوراق البنكنوت المصرية فيها عناصر تأمين عالية بتساعدك إنك تعرف العملة الأصلية من المزورة هنقولك عليها.

من عناصر التأمين البارزة دي هي العلامة المائية اللي بتختلف من فئة للتانية وكمان حاجات تانية كتير، وعلشان ماتكونش ضحية للفلوس المزيفة اعمل الخطوات دي واللي هتساعدك تفرق بسهولة بين العملة الأصلية والعملة المزورة.

ازاي نفرق بين الفلوس الأصلية والمزورة؟

1-   افرك العملة

بل صباعك وافرك ورقة العملة، لو مزورة الألوان هتطلع لكن العملة الأصلية الألوان فيها هتكون ثابتة.

2-   خط ضمان

العملة الأصلية بتلاقي عليها خط ضمان وهو خط كتابة مميز.

3-   خيوط بارزة

العملة الأصلية عليها خيوط بارزة وفيها لمعان وكمان رسوم مش مكتملة زي أبو الهول وعين حورس، وهتلاقيها كاملة في الضوء ولما تيجي تحركها في زوايا مختلفة لكن العملة المزيفة مفيش فيها الرسوم دي.

قلب في الفلوس كويس هتلاقي علامة مائية مطبوعة، وبتختلف من فئة للتانية

4-   علامة مائية مميزة

قلب في الفلوس كويس هتلاقي علامة مائية مطبوعة، وبتختلف من فئة للتانية يعني مثلًا العلامة المائية اللي هتلاقيها على فئة الـ 100 جنيه غير اللي على الـ 200 جنيه لكن الأكيد هتلاقي علامة مائية مميزة.

5-   بروز عند الأرقام

كمان العملة الأصلية هتلاقيها مميزة في البروز اللي عند الأرقام المكتوبة لكن العملة المزيفة مش هتلاقي فيها بروز.

6-   ملمس العملة

خلي بالك العملة الأصلية ملمسها بيكون خشن في حين المزورة ملمسها بيكون ناعم وأملس زي الورق المطبوع.

7-   ألوان العملة

من الحاجات اللي بتميز العملة الأصلية كمان إن ألوانها واضحة وزاهية وباينة للكل وكمان مش متداخلة مع بعضها لكن العملة المزيفة ألوانها باهتة وداخلة على بعض.

8-   أرقام مسلسلة منسوخة

من العلامات المميزة برضه إن العملة الأصلية بيكون مكتوب عليها أرقام مسلسلة منسوخة 4 مرات في أماكن مختلفة على العملة من قدام وورا لكن العملة المزيفة الأرقام اللي عليها بتكون عشوائية.