تخرج فين وبكام في إجازة عيد الفطر 2022؟ كلها أماكن مختلفة

إجازة عيد الفطر 2022 نويت تعمل فيها ايه ولا لسه؟ عاوز تخرج في مكان مختلف وتقضي أكتر من يوم حلو؟ خاصة إن الإجازة عند ناس كتير 9 أيام وتقدر تعمل فيها حاجات كتير وتنبسط.

هنقولك على أماكن كتير لخروجات العيد 2022 ممكن تكون أول مرة تسمع عنها المهم إنها كلها أماكن حلوة هتقضي فيها وقت حلو مع صحابك أو عيلتك، وكمان هنقولك على الأسعار وتفاصيل كل مكان.

اعرف ايه هي الحفلات المتاحة في عيد الفطر 2022 من هنا: حفلات وعروض فنية في عيد الفطر 2022 وأسعار التذاكر

خروجات عيد الفطر 2022 فين وبكام؟

كيدزانيا في القاهرة الجديدة

• من خروجات عيد الفطر لأطفالك وحلوة جدًا، مكان مليان بألعاب للأطفال من سن الـ 4 لـ 14 سنة.
• مدينة كيدزانيا بتستقبل الزوار من 11 الصبح للساعة 4 مساءًا، ومن الساعة 5 مساءًا للساعة 10 بالليل.
• أسعار التذاكر الأطفال أقل من 4 سنوات 100ج.
• الأطفال من 4 حتى 14 سنة 130 ج.
• المرافقين البالغين 85ج.

أدرينالين بارك في مدينة 6 أكتوبر 

• يمكن تكون أول مرة تسمع عنها لكن بنشرحهالك تكون خروجتك في إجازة عيد الفطر 2022.
• مكان مميز لكل اللي بيحبوا المغامرة، أدرينالين بارك عبارة عن مكان مفتوح من الأماكن المتخصصة في توفير ألعاب حرب الألوان “Paintball، وفيه تقدر تعمل فرقة بتتكون من 8أفراد أو أقل لكن مش أكتر.
• الزيارة متاحة من الساعة 12 مساءًا لغاية الساعة 9 مساءًا.
• سعر الفرد 150 جنيه شامل "الزي، المسدس، الطلقات"، وعدد الطلقات 100 طلقة، إضافة إلى حروب الليزر والألعاب المائية "الأكوا"، ومناسبة للأطفال من سن 3 سنين.

رفاهية في البحر الأعظم

• من أفضل خروجات العيد 2022 اللي فيها ألعاب حروب الألوان بينت بول paintball.
• الأسعار مرتبطة بالألعاب اللي هتلعبها يعني الـ 50 طلقة بـ 60 جنيه، وكرة قدم الفقاعات بـ40ج لمدة 30 دقيقة للفرد.
• في رفاهية هتقدر تستمتع بالسقوط على ملعب كرة الصابون وكمان هتلعب ألعاب الفيديو المختلفة والبلاي ستيشن كل دا في جو حلو ومختلف على النيل.

سمارت كامب في العبور

• سمارت من أفضل أماكن خروجات عيد الفطر 2022، واللي فيها تقدر تتزحلق على الرمال لمدة ساعة كاملة.
• هتلاقي كمان في سمارت كامب ألعاب مختلفة زي: الكرة الطائرة مفتوحة المدة، وكرة القدم، وكرم القدم الأمريكية، وكرة السرعة، والبينج بونج في صالة مغطاة.
• بس خلي بالك علشان تروح سمارت كامب لازم تحجز قبلها بيومين على الأقل، وعدد المجموعة ما يقلش عن 20 فرد.
• سعر الفرد 120جنيه لكن لو عدد الأفرد من 50:30 بيكون سعر الفرد 100 جنيه، ومتاح ركوب الخيل بـ 30 جنيه.

كريزي ووتر في الشيخ زايد

• من خروجات العيد المائية المختلفة، وبتعتبر من أقدم مدن الألعاب المائية في مصر وفيها الحدائق الخضراء، وألعاب الفيديو جيم، وسباق السيارات، وألعاب الليزر الشيقة، وحديقة الألعاب.
• كريزي ووتر بتستقبل الزوار من الساعة 10 الصبح لغاية الساعة 6 مساءًا.
• سعر التذكرة: 65 جنيه، الأطفال أقل من 3 سنوات مجانًا.

أفريكا سفاري

• مكانها في الكيلو 65 طريق "الإسكندرية – القاهرة" الصحراوي.
• حديقة للحيوانات مختلفة وتقدر تتمشى فيها بين الحيوانات بالعربيات، وفي بعض الأماكن فيها تقدر تتحرك فيها على رجلك عادي.
• هتلاقي في أفريكا سفاري طيور نادرة وحيوانات أليفة ومتوحشة.
• أفريكا سفاري بتشتغل من 9 الصبح للساعة 4 العصر.
• رسم دخول العربية الملاكي 400 جنيه.

جرين ديزرت

• المكان دا هتلاقيه على طريق مصر الإسكندرية الصحراوي وتحديدًا عند الكيلو 84.
• جرين ديزرت بيفتح أبوابه من 8 الصبح للساعة 8 مساءًا.
• هتقدر تقضي يوم على حمام السباحة وتفطر وتتغدى كل دا بـ 120 جنيه بس.

سكيت ماكس في مدينة 6 أكتوبر 

• من الخروجات المميزة في سيتي سكيب مول، وتقدر تستمتع هناك بالتزلج على الجليد من الساعة 10 الصبح لغاية الساعة 12 من صباح اليوم اللي بعده.
• الدخول للفرد بـ 25 جنيه لمدة 15 دقيقة، و40 جنيه لمدة 30 دقيقة، و60 جنيه لمدة 60 دقيقة.

جزيرة المعادي 

• مكانها قدام مستشفى القوات المسلحة، وبتتكون من مجموعة جزر صغيرة يصل بينها جسور صغيرة.
• هتلاقي هناك بحيرات صناعية ومطاعم وكافيهات وألعاب للأطفال مفتوحة.
• حديقة جزيرة المعادي بتفتح أبوابها من الساعة 10 الصبح للساعة 11 بالليل.
• سعر تذكرة الدخول للفرد 5 جنيه، وهتلاقي مركب للتجول حول الجزيرة بـ 10 جنيه للفرد.

حديقة الأزهر في شارع صلاح سلام

• من أجمل خروجات العيد 2022 وتنفع للأسرة، هتلاقي هناك مساحات خاضرة ومساحات واسعة علشان تقضي يوم جميل مع صحابك أو عيلتك.
• وأنت في حديقة الأزهر هتشوف قلعة صلاح الدين، وكمان هتلاقي المطاعم والكافيهات وأماكن ترفيهية مخصصة للأطفال.
• حديقة الأزهر بتفتح يوميًا من 9 الصبح لغاية الساعة 10 بالليل.
• أسعار التذاكر هي 15جنيه للفرد، و10جنيه للأطفال.

ملاهي السندباد في النزهة الجديدة

• ملاهي السندباد موجود قدام سور مطار القاهرة الدولي بمنطقة النزهة الجديدة.
• الملاهي بتفتح أبوابها من الساعة 10 الصبح لغاية الساعة 12 من صباح اليوم اللي بعده.
• أسعار الألعاب من 3 لـ 5 جنيه.

القرية الفرعونية في البحر الأعظم

• لو ماتعرفش عنها قبل كدا فايدتي بترشحلك تروحها وهي عبارة عن مجموعة من المتاحف فينها ناس حقيقيين لابسين زي الفراعنة وبيجسدوا الحياة المصرية القديمة.
• وهتلاقي في القرية الفرعونية نموذج لمقبرة توت عنخ أمون.
• القرية بتستقبل زوارها من الساعة 9 الصبح للساعة 7 مساءًا.
• الأسعار بتختلف حسب برنامج الزيارة، ودي الأسعار: 55 -  80 – 100 – 145 جنيه.
• وبالنسبة للأطفال اللي سنهم لغاية 10 سنين بيحصلوا على خصم 20%.

برج القاهرة في الزمالك عند النادي الأهلي فرع الجزيرة

• ومن خروجات العيد 2022، واللي فيه هتستمته بمنظر قلب القاهرة على جزيرة الزمالك بنهر النيل.
• برج القاهرة مكون من 16 دور وتقدر تشوف القاهرة كلها من خلال المنظار الكبير.
• من أشهر الأماكن فيه المطعم الدائري، واللي بيدور حول نقطة ارتكاز لترى القاهرة.
• تقدر تطلع الدور الـ 15 في الكافيتريا علشان تاكل وتشرب.
• برج القاهرة بيفتح يوميًا من 9 الصبح للساعة 1 من صباح اليوم التاني.
• أسعار التذاكر: 20 جنيه للمصريين والأطفال أكثر من 6 سنوات.