قارن بين: الواي بروتين الأيزوليت والكونسنتريت والهيدروليزد؟

بتروح الجيم وسمعت كلام كتير عن الواي بروتين ومش عارف ايه الفرق بين كل الأنواع؟! هنعملك مقارنة بين أشهر 3 أنواع من الواي بروتين: الأيزوليت والكونسنتريت والهيدروليزد، وهنقولك تجيبهم منين كمان.

1- الواي بروتين الكونسنتريتConcentrate:

ببساطة دا عبارة عن الصورة الأولية الخام للواي بروتين "بدون أي مراحل فلترة أو تصنيع" بعد ما بيتم استخراجه من اللبن، وبيحتوي على البروتين، والكربوهيدرات، والدهون واللاكتوز، ونسبة البروتين فيه بتوصل لـ 80%.

مكونات الـ 100 جرام واي بروتين Concentrate:

• 80 جرام بروتين.
• 9 جرام لاكتوز (سكر اللبن).
• 6 جرام دهون.
• 400 سعر حراري تقريبًا.

2- الواي بروتين الأيزوليت Isolate:

عبارة عن بروتين خام لكن بيعدي من مصافي وفلاتر ميكروسكوبية، وبالتالي بيتم عزل الدهون واللاكتوز منه، وبيتكون من 90% من البروتين. 

مكونات الـ 100 جرام واي بروتين Isolate:

• 90 جرام بروتين.
• 2 جرام لاكتوز (سكر اللبن).
• 1.5 جرام دهون.
• 370 سعر حراري تقريبًا.

3- واي بروتين هيدروليزد Hydrolyzed:

وفيه بيتم تعريض الواي بروتين للحرارة أو أحماض وإنزيمات معينة علشان يتم تكسير البروتين ويتحول لأحماض أمينية جاهزة إن الجسم يمتصها بسرعة، ودا بيساعد في سرعة الهضم لكن خليك عارف إن طعم بروتين هيدروليزد أكتر مرارة.

مكونات الـ 100 جرام واي بروتين Hydrolyzed

• 90 جرام بروتين.
• لا يحتوي على أي دهون أو كربوهيدرات.

بمناسبة كلامنا عن الواي بروتين وإنه واحد من أهم المكملات الغذائية اعرف أكتر من هنا: أشتري ايه مكملات غذائية للجيم والرياضة؟

لو عندك حساسية لاكتوز فاختيارك الأنسب الواي بروتين أيزوليت

طيب ايه الفرق بين الايزوليت والكونسنتريت؟

البروتين الايزوليت مرحلة متقدمة عن البروتين الكونستريت لأن الكونسنتريت بيحتوي على صورة أكتر من الكربوهيدرات (سكر اللاكتوز)، وكمان دهون لكن البروتين الأيزوليت بيحتوي على كمية قليلة جدًا من الكربوهيدرات وكمان نسبة ضعيفة جدًا لا تُذكر من الدهون ودا بيخليه الحل الأمثل للناس اللي عندها حساسية اللاكتوز.

وبالنسبة للأسعار؟

بتختلف من شركة للتانية لكن أغلى واي بروتين من التلاتة هو بروتين هيدروليزد Hydrolyzed، وبيجي بعده من حيث السعر الأيزوليت  Isolate وبعدين الكونسنتيريت  Concentrate هو الأقل في السعر ما بينهم.

ايه أفضل الأماكن اللي تجيب منها الواي بروتين والمكملات الغذائية عمومًا؟

TSS

Max muscle

Bodybuilding house

Nbs

House of supplement

ماتنساش إن المكمل الغذائي مش بيغنيك عن الأكل بالعكس هو بيكمل احتياجك اليومي، وعلشان تظبط الجرعة تابع مع الدكتور أو الكوتش اللي بيمرنك.