مين بيكسب أكتر الـ fulltime ولا الـ freelancer؟ الـHR!

في الفترة الأخيرة في مصطلح انتشر كتير وهو شغل "الفريلانس"، ومعناه انك بتشتغل لوحدك ومش تبع شركة معينة. وطبعا في ناس كتير بتفضل طبيعة الشغل دي علشان يكونوا حرين في اختياراتهم ومواعيدهم. في سلسلة المقالات دي هنقارن عدد من الوظايف ونعرف مين بيكسب أكتر اللي شغالين حرين/Freelance ولا اللي بدوام كامل/Full time.

وظيفة الموارد البشرية / الـ HR

الـ HR أو موظف الموارد البشرية من أهم الوظايف في العالم كله، لأن هو اللي في أيده يعين موظف شاطر يكمل معاك أطول فترة ممكنة ويخلي الشركة تنجح أو يعين موظف مؤهلاته مش مناسبة شروط ووصف الوظيفة، وكمان شطارة أي موظف بتدل على كفاءة موظف الموارد البشرية.

فـ لو أنت خبرة في المجال أو حتى بتبدأ فيه جديد! هل بتفضل تشتغل في شركة Full time ولا Freelance حر ومن غير أي رسميات؟

إجابتك على السؤال ده هتحددها لما تعرف أهم 5 نقط تقدر  تقارن من خلالهم: 

1- الاستقرار:

:Full Time

بما انك موظف في قسم الموارد البشرية، فـ أنت أكيد عارف اد ايه بيئة العمل المستقرة مهمة لأي موظف وهى اللى بتديله الطاقة انه يكمل ويشتغل بنشاط ده غير طبعا أهمية التأمين الإجتماعي والصحي اللي مش هتحتاج تشيل همهم.

:Freelance

لو هتشتغل فريلانس فـ كده هتتخلي عن كل حقوقك في التأمينات، وكمان الشغل مش هيبقى مستقر، هتلاقي إن شويه فيه شغل كتير وشويه لأ على حسب العلاقات اللي قادر تعملها مع الشركات اللي محتاجالك.

2- الدخل

 : Full Time

لو هتشتغل فى شركة هيبقى ليك مرتب ثابت وكمان في بعض الشركات بتطبق نظام الـ KPIs ودي حاجة بتقيس أدائك كل شهر وبتاخد مبلغ ساعتها بيتحدد على حسب التارجت بتاعك وحققته بنسبة اد ايه.

المرتبات الـ HR بدوام كامل بتبدأ من:

للمبتدئين بيبدأ من 3,700 جنيه

والمتوسط بيوصل لـ 8,500 جنيه 

والموظفين اللي عندهم خبرة أكتر من 10 سنين في مجال الموارد البشرية بتوصل مرتباتهم لـ 15,000 جنيه

 :Freelance

مرتبك هنا بيكون في الغالب عمولة بتتحدد على حسب عدد الناس اللي أنت عينتهم وطبعا الـ fees بتاعتك بتختلف على حسب الشركة أو المكان اللي شغال معاه فريلانسر.

لو هتشتغل فريلانس فـ كده هتتخلي عن كل حقوقك في التأمينات

اقرأ كمان: مين بيكسب أكتر fulltime ولا freelancer؟ Content Writer

3-  المصاريف

:Full Time

الشركة هتبقى مسؤولة وقتها انها بتوفرلك كل حاجة انت محتاجها زي باقة مكالمات وانترنت عشان تكلم المرشحين لأي وظيفة وكمان لاب توب

:Freelance

طبعا أنت اللي بتشتري كل حاجة لنفسك، باقة ولاب توب وموبايل للشغل عشان تتكلم منه.

4- قواعد الشركة:

:Full Time

بما إنك شغال HR، فـ لازم تكون قدوة لباقي الموظفين وتطبق كل قواعد الشركة زي أوقات العمل الرسمية واللبس اللي مسموح تيجي بيه...إلخ.

:Freelance

ساعاتها مش هتبقى مقيد بـ أي قواعد وفي الغالب هتبقي شغال براحتك في الوقت اللي يناسبك من البيت، بس المهم انك تقدر تنجز شغلك في الـ Deadline.

5- فريق العمل:

:Full Time

الشغل في الشركات ليه ميزة انك بتبقى قاعد مع باقي الفريق وبتتبادلوا الخبرات والمعلومات الجديدة، ده غير ان الشغل نفسه بيتقسم عليكم ومش لازم تأخد كل خطوات التعيين والأوراق لوحدك.

:Freelance

لو هتشتغل لوحدك هيبىقى عندك حرية أكتر في اختيار الموظف وطبعا لازم يتوافق مع شروط وميزانية المكان اللي انت شغال معاه، لكن للأسف هتضطر تقوم بكل خطوات التعيين لوحدك، بداية من التدوير على شخص مناسب للوظيفة لغاية الإمضاء العقد وطلب الأوراق الشخصية.

باختصار، الوظيفة دي محتاجة فريق عنده خبرة في كل خطواتها، والشغل في Full time في شركة هيكون أفضل لك خصوصا لو لسه بادي فيها جديد.