مين بيكسب أكتر fulltime ولا freelancer؟ Content Writer

في الفترة الأخيرة في مصطلح انتشر كتير وهو شغل "الفريلانس"، ومعناه انك بتشتغل لوحدك ومش تبع شركة معينة. وطبعا في ناس كتير بتفضل طبيعة الشغل دي علشان يكونوا حرين في اختياراتهم ومواعيدهم. وفي سلسلة المقالات دي هنقارن عدد من الوظايف ونعرف مين بيكسب أكتر اللي شغالين حرين/Freelance ولا اللي بدوام كامل/Full time.

تاريخ  الـ Content Writing ؟ 

المحتوى ليه أكتر من شكل، وموجود من أيام المصريين القدماء لما كانوا بيرسموا صور ويحكوا قصتهم بالهيروغليفي على جدران المعابد والمقابر. وفي الحقيقة الموضوع موقفش لحد كده ووصلنا لـ سنة 1895 وعمل الأمريكي John Deere أول مجلة كانت بتنشر مقالات وأخبار عن الزراعة والبناء، وكمان كان بيعمل اعلانات لمنتجاته اللى كان بيصنعها ويبعها في شركته Deere & Company، ووصل عدد الناس اللى بتقرا المجلة لـ 40 مليون شخص في العالم  في سنة 1912.

مين هو كاتب المحتوى/ الـ Content Writer؟
 

الـ Content Writer هو المبدع واللي بيطلع افكار جامدة بيترجمها في محتوى على شكل مقالات بيبيع فيها أفكار أومنتجات، على حسب العميل اللي بيكتبله، وبالأفكار دي يقدر ينجح الشركة ويوصلها للعملاء الصح اللي فعلا محتاجين المنتج بتاعهم.

لو انت بتشتغل في المجال من سنين أو حتى لسه جديد فيه، بتفضل تشتغل Full Time في شركة ولا Freelance من بيتك ومن غير أي رسميات؟

اقرأ كمان: Copywriter vs Content Creator: ايه الفرق ما بينهم؟

إجابتك على السؤال ده هتحددها لما تعرف أهم 5 نقط تقدر تقارن من خلالهم: 
 

1- الاستقرار

Full Time
 

من أكبر المميزات اللى هتلاقيها لما تشتغل من الشركة هى الاستقرار، المرتب اللي بينزل كل شهر في نفس الميعاد مثلا، والتأمين الاجتماعي والطبي اللى الشركة بتقدمهولك وهيفيدك على المدى القريب والبعيد.
 

Freelance

لما تشتغل من البيت Freelance تبع شركة مثلا او بتكتب لأكتر من موقع، هتتحاسب على قد الكمية اللي كتبتها بس، ده غير أنك هتتخلى عن التأمين الطبي والاجتماعي لأن الشركات بتقدم التأمينات للموظفين اللى كاتبين عقد بس.
 

لما تشتغل في شركة هيبقى ليك مرتب ثابت، وبعض الشركات الكبيرة بتدي لـ كاتب المحتوى KPIs وده مبلغ بيتحدد على حسب مستواك في الشغل كل شهر

2- الدخل
 

Full Time
 

لما تشتغل في شركة هيبقى ليك مرتب ثابت، وبعض الشركات الكبيرة بتدي لـ كاتب المحتوى KPIs وده مبلغ بيتحدد على حسب مستواك في الشغل كل شهر، وكمان في نظام الـ Bonus وده ممكن تاخده كل 3 شهور والمبلغ ده بيتحدد على حسب حاجات كتير منها التارجت وحققت منه اد ايه والأداء في العموم.

مرتبات الـ Content Writer بدوام كامل بتبدأ من:
 

• Junior Content Writer : بيبدأ من 2,500 جنيه
• بيبدأ من 5,000 جنيه : Senior Content Writer
   

Freelance
 

لو اشتغلت Freelance تبع شركة هيكون ليك مرتب ثابت بتاخده كل شهر، وممكن يبقى على حسب البروجيكت واللي ممكن يبقى شهر أو 3 شهور، وفي ناس بتتحاسب بالمقال وبيكون ليه تسعيرة محددة من البداية.

مرتبات الـ Content Writer الفريلانس بتبدأ من:

بوست المحتوى للسوشيال ميديا بتتحسب من 75 لـ 100 جنيه

المقال بيتحسب بعدد الكلمات وبيبدأ من 300 جنيه للمقال وبيوصل لـ 1,000 جنيه 

3- المصاريف

Full Time
 

الشغل في شركة بدوام كامل بيخليك تصرف فلوس في المواصلات والأكل..ألخ، بس برضو الشركة بتديك لاب توب تشتغل بيه، وبعض الشركات بتوفر كورسات بتنمي من شغلك وموهبتك.

Freelance

لو اختارت تشتغل فريلانس هتوفر فلوس المواصلات وأي مصاريف بتدفعها في النزول، بس هتشتغل باللاب توب بتاعك، وهتدفع اشتراك الانترنت والكهرباء والمياه والشاي والقهوة كمان عليك.

اعرف أكتر عن طرق التوفير مع الشغل في البيت من هنا، وفرت قد إيه من الشغل فى البيت فى زمن الكورونا؟

4- قواعد الشركة
 

Full Time

اشتغلت في شركة؟ يبقى لازم تمشى على قواعدها زي مواعيد الحضور والانصراف والبريك، وكمان لازم تاخد بالك من اللبس اللى بتروح بيه.

Freelance

ودي من أكبر مميزات شغل الفريلانس عشان مش هتبقى مقيد بمواعيد، لكن هشتغل فى الوقت اللى بيريحك.
 

5- فريق العمل

Full Time

وجودك بشكل مستمر في الشركة هيساعدك تعمل علاقات كويسة مع زمايلك في الشغل وخاصة مع التيم بتاعك، وده هيساعدكوا لما تعملوا Brainstorming تطلعوا دايما افكار حلوة.

Freelance

لما تشتغل لوحدك ده ممكن يوصلك في بعض الأوقات لـ مرحلة الـ Creative Block، بمعنى ان ممكن دماغك متقدرش تطلع أفكار زي الأول، لكن لو انت من الناس اللي بتفضل التفكير لوحدها ممكن تطلع بأفكار رائعة.
 

باختصار، الوظيفة دي تكون فى شركة بتطلب عدد كبير من المحتوى عشان تقدر تعمل portfolio كويس واسم في المجال قبل ما تأخد شغل freelance، حتى على الأقل عشان تقدر تطلب رقم كويس في الأعمال الحرة اللي بتجيلك.