مين يكسب؟ اوبر ولا كريم؟ الأسرع والأوفر

قاعدين فى أمان الله فى المكتب بنتناقش وفجأة الموضوع قلب بخناق بسبب أوبر وكريم، وفى اتنين اتعصبوا أكتر من ألتراس الأهلى والزمالك يوم ماتشات القمة، وكل ده عشان واحد شايف أن أوبر أحسن مشروع وصل مصر من سنين، والتاني شايف أن كريم عامل اللي عليه وزيادة وأنه منافس قوي يقدر يأكل السوق. المهم حاولنا نهدي فيهم ومفيش فايدة، طيب إيه اللي يرضيكم؟ كل واحد عايز يقنعنا بالتجربة، قلنا ومالوا يلا نجرب، فى اتنين اتبرعوا يجربوا نفس المشوار من شبرا للزمالك، واتنين كمان قالوا هيجوا من وسط البلد للزمالك، واحد هيطلب أوبر والتاني هيطلب كريم، وهنقارن كلنا بكره الصبح،والتحدي كان مين هيوفر أكتر؟ ومين هيوصل الأول؟ ومين اسهل ابليكشن فى الاستخدام؟

أوبر VS كريم

Careem VS Uber

مين أوفر؟

اللي ركبوا من وسط البلد وصلوا الزمالك مع بعض وكريم كانت أوفر من أوبر لأن اللي استخدم كريم اختارGo Awfar وده اختيار بيوفر حوالي ٢٠% عن الاختيار العادي لكن العربيات بتكون موديلاتها أقدم، واللي اختار أوبر استخدم أوبرX  . وعلى العكس بالنسبة للي ركبوا من شبرا للزمالك، أوبر كان أوفر على الرغم من أنهم وصلوا مع بعض برضوا لأن اللي ركب أوبر اختار أوبرX برضه وده بيوفر حوالي ٢٥% عن الاختيار العادي، واللي ركب كريم اختار العربية العادية.

• الرحلات من وسط البلد للزمالك:

                    - أوبرX :              دفع ٢٩ جنيه

                    -كريمGo Awfar : دفع ٢٣ جنيه

• الرحلات من شبرا للزمالك:

                    -أوبرX :             دفع  ٣٣ جنيه

                    -كريم :               دفع ٣٥ جنيه

ال٢ متشابهين فى ميزة أن الكابتن بيحطلك الباقي في محفظتك وإنك تقدر تحاسب بالكريديت كارد عادي

مين أسهل؟

من ناحية سهولة الأبلكيشن فهي بترجع على حسب أنت متعود تستخدم إيه! لكن بعد ما بتبدأ تستخدم ال٢ كتير بتحس قد إيه هما متشابهين جدا، ويعتبروا فعلا من أسهل التطبيقات اللي بنستخدمها فى حياتنا، واللي اتبرعوا بالتجربة محسوش ان فى واحد منهم أسهل من التاني.

ال٢ متشابهين فى ميزة أن الكابتن بيحطلك الباقي في محفظتك وإنك تقدر تحاسب بالكريديت كارد عادي، لكن كريم عنده ميزة مش موجودة فى أوبر، هي تجميع النقط من الرحلات اللي بتعملها، واللي بتقدر تستبدلها فى كذا حاجة، زي offer على الرحلات، فلوس فى المحفظة، تخفيض فى الشوبينج و اوردرات الأكل، وممكن كمان تتبرع بيهم أو تأخدهم أميال سفر.

بالنسبة لأكتر اختلاف هتحس بيه ما بين ال٢ هو خدمة العملاء، لأن كريم بيوفر رقم تليفون بتقدر تكلمه وتشتكيله وقت وقوع المشكلة مع الكابتن وبيحلوها على طول، وده عكس الـ customer service فى   أوبر اللي بتحتاج تبعت لهم رسالة وتستني يردوا عليك بعد فترة، والتعامل مابينكم  بيبقي بالرسايل بس.

مين أسرع؟

على غير المتوقع اللي اتنين كانوا بيوصلوا فى نفس التوقيت، إذا كان من ناحية وصولهم علشان الرحلة تبدأ أو توصليهم للزباين، والفروق مابينهم كانت لا تذكر ما بين دقيقة لدقيقتين.

ال٢ متشابهين جدا، الاختلافات كلها بترجع لتعودك على استخدام ابلكيشن معين، ومتابعتك لـ offers والبرومو كود عليه.

نبذة عن الأبلكيشن:

أوبر: هي شركة أتأسست لخدمات تأجير العربيات في ٢٠٠٩ في ولاية كاليفورنيا في أمريكا. جات فكرتها لمؤسسينها ترافيس كالانيك وغاريت كامب لما قبلوا مشكلة توقيف تاكسي في باريس، ففكروا فى إمكانية وجود خدمة تأجير عربيات بتقدر تطلبها من خلال ابلكيشن على الموبايل، ونفذوا الفكرة بعدها بسنة على طول.

كريم: هي شركة متخصصة بتقديم خدمات التوصيل من خلال الويب سايت والابلكيشن بتوعها. اتأسست سنة ٢٠١٢ في دبي على إيد مدثر شيخا وماكنس أولسون وبدأت فى الأول كشركة لتأجير العربيات على الإنترنت، وتطورت بعد كده لشركة خدمات نقل لتأجير السيارات للاستخدامات اليومية. عندها مكاتب في أكتر من ١٥ مدينة في الشرق الأوسط وأفريقيا وجنوب أسيا. وفى ٢٠١٩ استحوذت عليها شركة أوبر.

مين يكسب؟ هي مقالات التحدي بين تيم واحد قاعد بيجرب الابلكيشن اللي بنستخدمها فى حياتنا اليومية عشان يوصل لأوفر و أفضل خدمة، وكل التحديات عن تجربة حقيقة بالأسعار الحقيقية ، قام بيها تيم فايدتي عشان يفيدكم و يساعدكم توفروا كل يوم.