ايه الفرق بين التأمين على الحياة والتأمين والادخار؟

التأمين جزء مهم من الخطة المالية اللي بتعملها عشان تتفادى أي ضرر ممكن يحصلك في أي وقت، والتأمين على الحياة من أشهر الأنواع اللي ناس كتير بتلجأله عشان تأمن بيه حياتها ومستقبل أسرتها.

ايه هو التأمين؟
 

هو عقد بتتفق عليه مع شركة التأمين وعلى أساسه بتدفع قسط تأميني شهري أو سنوي، وده بيبقى مقابل مبلغ شركة التأمين بتدفعهولك في حالة أي ضرر ممكن يحصل ليك أو لأسرتك أو لحاجة من ممتلكاتك، على حسب نوع التأمين.

والتأمين على الحياة ليه نوعين:
 

1- التأمين على الحياة فقط:

النوع ده بيأمن حياتك لفترة أنت اللي بتحددها في بوليصة التأمين والقسط التأميني مش بيبقى كبير عشان المبلغ التأميني بيتدفع في حالة واحدة بس. بمعنى ان لو المؤمن عليه اتوفي خلال المدة المتفق عليها مع شركة التأمين، الورثة أو المستفيدين من بوليصة التأمين بياخدوا المبلغ التأميني، ولو محصلتش الوفاة خلال المدة دي الورثة مش بياخدوا المبلغ.

التأمين على الحياة من أشهر الأنواع اللي ناس كتير بتلجأله عشان تأمن بيه حياتها ومستقبل أسرتها.

2- التأمين على الحياة والإدخار:
 

النوع ده بيشبه التأمين على الحياة فقط بس مدة التأمين بتبقى أطول شوية 20 أو 30 سنة والقسط هنا بيكون أعلى لأنه اشبه بالشهادة اللي بتحوش فيها، بمعنى ان لو المؤمن عليه اتوفي خلال المدة اللي اتفق عليها مع شركة التأمين، المستفيدين من البوليصة بياخدوا المبلغ التأميني، ولو البوليصة خلصت في حياته، هو اللي بياخد المبلغ، وبيعتبر زي معاش تاني ليه.

أدخل على البلوج ده عشان تعرف أكتر عن أنواع التأمين من هنا، التأمين على الممتلكات ولا على الحياة، تختار إيه!