في عالم الفلوس يعني ايه جند وباكو وأرنب وديك رومي؟

بكام الحاجة دي؟ بــ 10 بواكي! يعني 10 آلاف جنيه والمصطلح دا واحد من الحاجات اللي بتُستخدم في عالم الفلوس زي البريزة والريال والأرنب والديك الرومي، كل الكلام دا له علاقة بالفلوس.

طيب هل المقصود بالبريزة دلوقتي 10 قروش والريال 20 قرش زي زمان؟ طب يعني ايه بريزة كبيرة.

ليه بنسميها فلوس أصلًا؟

المصطلح دا اللي بنقوله حاليًا أصله كلمة "فلس" ودي كلمة يونانية وكانت بتتقال على عملة نحاسية صغيرة، أما كلمة جنيه فجت من كلمة لاتينية "poundus" واللي معناها "الوزن".

مسميات الفلوس في المصطلحات الشعبية

·   الأرنب: مليون جنيه.

·   نص أرنب: نص مليون  (500 ألف جنيه).

·   ربع أرنب: ربع مليون (250 ألف جنيه).

·   باكو أو أستيك: ألف جنيه.

·   الديك الرومي: مليار جنيه "مش منتشر أوي لكن أشهر موقف ليه في فيلم عمارة يعقوبيان لما خالد صالح قالها لنور الشريف".

·   البريزة: 10 جنيه.

·   الريال: 20 جنيه.

·   شلن: 5 جنيه.

·   البريزة الكبيرة: 100 جنيه.

·   جندي: جنيه.

هي الفلوس كانت طول عمرها ورق؟ اعرف أكتر من هنا، نبذة عن تاريخ الفلوس الورقية

نص بريزة يعني 5 جنيه أو بريزة ونص يعني 15 جنيه 

البريزة والريال اتلغوا طب ازاي؟!

أيوة هما اتلغوا فعلًا وكانوا وحدتين أقل من 100 قرش "جنيه"، البريزة كانت 10 قروش والريال 20 قرش، ولكن في اللغة الشعبية بتُستخدم بقصد تاني يعني العشرة جنيه "بريزة"، والعشرين "ريال".

مش بس كدا دا كمان ممكن يتقال نص بريزة يعني 5 جنيه أو بريزة ونص يعني 15 جنيه وهكذا.

بمناسبة كلامنا عن العملات القديمة اعرف معلومات أكتر من هنا، ازاي تكسب من الفلوس النادرة، ومين بيقبل الفلوس المقطعة؟

شخلل عشان تعدي!

احنا كمصريين بنستخدم مصطلحات لما نطلب فلوس بطريقة غريبة شوية زي مثلًا: أبجني تجدني (يعني هات فلوس علشان أخلصلك اللي عاوزه)، وابرز (هات فلوس) وكمان "كيشني" يعني اديني فلوس وأصلها جاية من cash.

وفي مصطلحات عامية بتستخدم بين كتير من الناس في تداول الفلوس زي: اب "طلع فلوس" – اهرش "طلع فلوس" – شخلل، زي فيلم سلام يا صاحبي والجملة الشهيرة "شخلل عشان تعدي".

بتعرف تفرق بين الفلوس الأصلية والمزورة هنقولك على شوية حاجات هتساعدك من هنا، 8 طرق علشان تفرق بين الفلوس الأصلية والمزورة!