ليه مصر اشترت 44 طن من الذهب في بداية 2022؟

تفتكر ليه البنك المركزي المصري اشترى 44 طن من الذهب خلال الفترة الأخيرة وتحديدًا مع بداية السنة دي 2022؟

مركز المعلومات ودعم اتخاذ القرار بمجلس الوزراء المصري أعلن بشكل رسمي إن البنك المركزي المصري اشترى 44 طن من الذهب في فبراير اللي فات 2022، ودا خلاه يُصنف كأكبر مشتري للذهب بين البنوك المركزية العالمية خلال الربع الأول من 2022.

اعرف أكتر عن الاستثمار في الذهب من هنا: يعني إيه استثمار في الدهب؟

حجم الذهب في البنك المركزي المصري

وبعد عملية شراء 44 طن ذهب ارتفع حجم الذهب للبنك المركزي المصري بمعدل 54% ليصل لـ 125 طن بنهاية فبراير، ودا بيعادل 17% من إجمالي الاحتياطات المصرية اللي بتعتبر الأعلى بين دول المنطقة.

مصر بتزود إنتاج الذهب المحلي

ولو ماتعرفش خلينا نقولك إن مصر بتشتغل على زيادة إنتاج الذهب المحلي على المدى الطويل من منجم السكري وغيره من المناجم، ومصر بتنتج سنويًا حوالي 16 طن من الذهب معظمه من منجم السجري في محافظة أسوان.

أسباب شراء مصر للذهب

حسب آراء الخبراء اللي جمعتها فايدتي ففكرة شراء مصر للكمية دي من الذهب خلال الربع الأول من 2022 له فوايد زي:

• تغطية العملة.
• تشجيع المستثمرين الأجانب برسالة معناها إن مصر عندها الشجاعة والسياسة لمحاربة التضخم.
• تعزيز الاحتياطات.
• إجراء احترازي من مصر خوفًا من أي تقلبات سياسية ممكن تحصل خلال الفترة الجاية واللي ممكن تسبب زيادة في سعر الدولار وتضخم عالمي.
• ربط الاحتياطي النقدي بالذهب مش بالدولار بيساعد على مواجهة أي مفاجأت اقتصادية ممكن تحصل في أي وقت.

تعرف ايه عن مصنعية الذهب؟ اعرف أكتر من هنا: احسب مصنعية الذهب 2022 من غير ما يتضحك عليك

مفيش توضيح من جهة مصرية

ولغاية دلوقتي بيعتبر تقرير الحكومي الرسمي هو مصدر كل المعلومات دي لكن مفيش توضيح من جهة مصرية رسمية عن سبب مصر في شراء الذهب لدعم الاحتياطي.

وكمان مفيش تفاصيل أكتر تساعد المستثمرين إنهم يفهموا السياسات النقدية والاقتصادية للحكومة المصرية وتقلل الجدل عن تأثير الخطوة دي بالإيجاب أو بالسلب على الاقتصاد المصري.