يعني إيه بنك مميكن E-Bank؟اعرف أكتر عن خدماته

" فرع مميكن! تقدر تفتح حساب، تصرف شيك، تعمل إيداع، تحول فلوس، وفي Video call لو عايزين تكلموا خدمة العملاء"

الجملة دي شدتنا كلنا في الإعلان عن أول فرع بنك إلكتروني أو Electronic service branch في مصر، واللي يعتبر رائد فيه البنك الأهلي واللي بدأ بأفتتاح أول 4 فروع مميكنة ليه من حوالي سنة ونص، ومن بعده بدأت بنوك تانية في تجهيز فروع مميكنة مجهزة بأحدث أنظمة التكنولوجيا في المجال المصرفي.

مكن الـ ATM والـ ITM، أو ماكينة الصراف التفاعلية بتتميز بوجود خدمة الفيديو كونفرنس، أو فيديو كول

إيه هو البنك المميكن؟

الفروع المميكنة أو الإلكترونية هي نوع متطور من فروع البنوك بتقدم الخدمات المصرفية  بطريقة إلكترونيا من غير موظفين عن طريق مكن الـ ATM والـ ITM، أو ماكينة الصراف التفاعلية اللي بتتميز بوجود خدمة الفيديو كونفرنس، أو فيديو كول عشان يقدر يتكلم العميل مع موظف البنك بالصوت والصورة.

في معاملات كتير من المعاملات البنكية تقدر تقوم بيها في الفرع الـ E-Bank، هي:

• تقدر تفتح حساب.
• الإستفسار على رصيدك في حسابك البنكي، التوفير أو الجاري.
• السحب من الحسابات البنكية، وبيختلف مبلغ السحب المسموح بيه في اليوم على حسب البنك.
• إمكانية الإيداع في الحسابات الجارية والتوفير، وبرضه بيختلف مبلغ الإيداع المسموح بيه في اليوم على حسب البنك.
• مكن الـ ITM بتديك فرصة لسحب وإيداع مبالغ أكتر من الحد المسموح بيه يوميا لمكن الـ ATM.
• التحويل بين حساباتك المختلفة في نفس البنك أو بين أكتر من حساب في بنوك مختلفة.
• تقديم طلبات الحصول على بعض المنتجات البنكية عن طريق خدمة الـ E-form.
• إمكانية إيداع الشيكات للبنك نفسه، أو لبنوك تانية، وبتوصل لـ ٢٠ ورقة شيك في المعاملة الواحدة.
• صرف الشيكات.
• تقدم على طلب دفتر شيكات.
• الاستفسار على القروض.
• استبدال العملة.
• دفع الفواتير، خصوصا بعد مبادرة البنك المركزي " باي باي نقدية".
• تقدر تدفع فواتير خطوط الموبايل أو تشحنه.
• كل معاملة بنكية بتقدر تأخد بيها إيصال.
• الـ ITM فيها ميزة التوقيع الإلكتروني، وتصوير بطاقة الرقم القومي عشان يتأكد موظف البنك من شخصية العميل قبل ما يقوم بأي معاملات.
• الفروع دي بتقدملك الخدمات البنكية طول أيام الأسبوع من الساعة 10 الصبح لـ10 بليل.