يعني إيه تمويل استهلاكي ومميزاته؟

التمويل الإستهلاكي هو لما شركة توفر خطط تمويل لعملائها عشان يقدروا يقسطوا منتجاتها زي شركات العربيات وشركات الموبيليا وغيره. وقدرت الحكومة إن حجم التمويل الإستهلاكي وصل لـ70 مليار جنية في 2015، وده سوق كبير خصوصاً لإن في نفس السنة قدرت الحكومة إن حجم القروض كان تقريياً 60-70 مليار من السوق، وده معناه إن حجم التمويل الإستهلاكي موازي تقريباً لسوق الإقتراض.

مميزات التمويل الإستهلاكي:

1. مش محتاج تحمل سعر الحاجة اللي هتشتريها على الكريدت كارد مرة واحدة، ولكن عن طريق خطة التقسيط تقدر تدفع على مهلك.

2. الموافقة على التمويل عادة بيحصل لما بتشتري المنتج، وده بيبقى أسرع من إنك تقدم على قرض أو كريدت كارد في البنك.

3. الشركة ممكن تقدم مميزات زي إلغاء دفع الفايدة لما تدفع تمن المنتج بالكامل قبل تاريخ معين.

4. مدة التقسيط ممكن تبقى أطول من مدة التقسيط بتاعة قرض بنكي، وطبعاً بيعتمد على نوع القرض اللي بتقارن بيه، وتمن المنتج اللي هتشتريه.

5. بالنسبة للشركات اللي بتقدم التمويل، فالميزة الأساسية هي زيادة نسبة المبيعات خصوصاً لو العملاء لقوا إن تجربتهم مع الشركة كانت ناجحة، فهم أكيد ممكن يرشحوا الشركة لأصدقائهم وعائلتهم.

التمويل الإستهلاكي هو لما شركة توفر خطط تمويل لعملائها عشان يقدروا يقسطوا منتجاتها زي شركات العربيات وشركات الموبيليا وغيره.

مستقبل التمويل الإستهلاكي

من المتوقع إن الحكومة هتصدر قانون لتنظيم معاملات التمويل الإستهلاكي وده لإنها لقت إن في أغلب الأوقات التمويل الإستهلاكي بيبقى غير منظم، وغير مراقب أو رسمي.

أمثلة على التمويل إستهلاكي

• تطبيق ValUاللي بيسمحلك تشتري أي حاجة بالتقسيط من المحلات والشركات اللي بتتعامل مع ValU  زي أيكيا وسوق وغيره، بعد التسجيل في الخدمة، ومدة التقسيط بتتراوح من 3-24 شهر.

• شركة بي تك بتقدم تقسيط على تقريباً كل منتجاتها، وفي شوية خطط تقسيط بدون فوايد، وممكن تقسط لغاية 24 شهر بدون مقدم.

• شركة راية بتقدم تقسيط على منتجاتها وفي كذا محافظة، ولكن بتشترط دفع مقدم على الأقل 10%، وخطط التقسيط المتاحة ممكن تمتد لغاية 36 شهر.