يعني إيه سوق العمل، وإيه هي أنواعه ومكوناته الأساسية؟
تاريخ النشر: 03 ديسمبر 2020 قاموس الفلوس
سوق العمل تعريفه، ومكوناته، وانواعه
من أول ما بنتخرج بنبدأ نسمع كلمة سوق العمل، ازاي بيتدخل؟ ومحتاج إيه دلوقتي؟ وايه الكورسات اللي بتأهل لسوق العمل؟ وإيه الشهادات المطلوبة فيه؟
قولي بقي بعد كل الدعاية دي والكورسات والتحضيرات، عرفت سوق العمل مكانه فين؟
تعريفه:
باختصار، سوق العمل هو سوق افتراضي بيعتبر من الأسواق الاقتصادية اللي بيجتمع فيه كل اللي بيدوروا على وظايف مناسبة مع أصحاب الشركات المختلفة، يعني بيعتبر حلقة وصل الموظفين المحتملين مع وظايفهم الجديدة.
مكوناته:
العرض: هو الموظفين أو الإيد العاملة الجاهزة للشغل وعندها الإمكانيات المطلوبة.
الطلب: هو الشركات وأصحاب الأعمال اللي محتاجين لإيد عاملة جديدة في مشاريعهم.
في أزمة تعارض بين المهارات اللي بيتعلمها الشباب في حياتهم التعليمية مع المهارات اللي بيبقي محتاجها أصحاب الأعمال فى موظفينهم الجداد.
أنواع سوق العمل:
1- سوق العمل المحكم: هو السوق اللي معروض في فرص للوظايف أكتر من اللي طالبين شغل.
2- سوق العمل الراكد: بعكس المحكم، ده بيكون في أيد عاملة طالبة شغل أكتر من الوظايف المعروضة.
النموذج المعروف لسوق العمل:
- صاحب العمل/الشركة/مديرالمؤسسة.
- المنافسة ما بين الشركات على المنتجات لإنتاجها بأقل التكاليف الممكنة مع أحسن جودة.
- الرسوم المتفقين عليها للمنتجات والسلع.
- النقل من مكان للتاني بالنسبة للموظفين والشركات عشان يحققوا أكبر نسب النجاح.
سبب الاهتمام بسوق العمل من بداية الحياة العملية للشباب أنه فعلا صعب الدخول، خصوصا مع الزيادة السكانية ووجود مهارات كتير مشتركة بين أغلبية الشباب اللي أعمارهم قريبة من بعض، وده بيتقابل مع قلة فرص العمل المعروضة. ده غير وجود أزمة تعارض بين المهارات اللي بيتعلمها الشباب في حياتهم التعليمية مع المهارات اللي بيبقي محتاجها أصحاب الأعمال فى موظفينهم الجداد. وده اللي بيجبر خارجين الجامعة على التقديم في كورسات تزود فى فرصهم في الترشيح للوظايف بعد التخرج على طول.
قانون العمل:
سوق العمل ليه قانون بيحط الشروط والقواعد اللي بيتعامل على أساسها أصحاب الأعمال مع موظفينهم، اسمه قانون العمل. ومن القواعد اللي بيحطها القانون: تحديد الأجور، ومواعيد العمل، وعدد أيام الإجازات.
