يعني إيه مصطلح استدامة؟

الاستدامة هي قدرة نظام على التواجد من غير تأثير سلبي على البيئة اللي حواليه دلوقتي أو في المستقبل، بمعنى أصح لازم يتم حساب تكلفته الاقتصادية والبيئية والمجتمعية، وتطلع الحسبة إيجابية في كل الحالات، وفي نفس الوقت يكون النظام قادر على التواجد في المستقبل مع استمرارية تأثيره الإيجابي على المجتمع، وعلى الأقل، لو مالوش تأثير إيجابي، يكون تأثيره مش سلبي.

إيه الهدف من الاستدامة؟

الهدف الأساسي هو الاستمرارية مع تحقيق احتياجات الناس بطريقة هادفة ومن غير استنزاف الموارد الطبيعية أو إضرار بأي مجموعة من البشر أو الحيوانات أو حياة بيئية متواجدة قريب من النظام المستدام، والمفروض إن النظام ده بيبقى قابل للاستمرار وتحقيق ربح في حالة أنه مشروع اقتصادي.

الاستدامة بتطلب من الحكومات والشركات انهم يراعوا الحياة حواليهم، ويفكروا في المستقبل، وبكدة الربح مبقاش الحاجة الوحيدة اللي الحكومات والشركات بتهتم بيها، ولكن كمان استمرارية مشاريعهم بطريقة متماشية مع الحياة من حولهم، يعني لازم يفكروا في الحالة التعليمية والصحية للمجتمع اللي حواليهم وانهم ما يزودوش من معدل الفقر وده عن طريق انهم يقدروا يوصلوا لطرق بديلة تقدر تعالج الأزمات الاقتصادية. وبكدة القرارات اللي بيخدوها مش بس بتخص الحاضر، ولكن بتخص المستقبل كمان.

ركائز الاستدامة:

١- الاقتصاد: النظام المستدام لازم يحقق ربح لاصحابه وإلا مبقاش قابل للاستمرار.

٢- البيئة: لازم ما يأثرش بالسلب على البيئة اللي حواليه، بيئة حيوانية أو نباتية أو غيره من النظم البيئية.

٣- المجتمع: لازم ما يضرش أي مجموعة بشرية أو يأثر على جودة حياتهم بأي شكل، فلازم النظام يلاقي توازن لوجوده.

من زمان جداً كان استهلاك البشرية الموارد البيئية أكتر من اللي بتنتجه،  وده كان سبب هجرة الناس من مكان للتاني كل موسم عشان يدوروا علي الموارد

تاريخ الاستدامة:

من زمان جداً كان استهلاك البشرية الموارد البيئية أكتر من اللي بتنتجه،  وده كان سبب هجرة الناس من مكان للتاني كل موسم عشان يدوروا علي الموارد، وكمان وقتها كانوا بيعتمدوا على الرعي أكتر من الزراعة ومكانوش يعرفوا ان ده بيرهق التربة بشكل كبير. فضل الحال بالشكل ده حتى مع بداية بناء القرى والمدن وزيادة عدد السكان، لأن كل ده كان بيشكل ضغط كبير على البيئة، وعشان كده الناس بدأت تنتقل لأماكن البيئة بتوفر لهم فيها استدامة أكبر لممارساتهم ونشاطاتهم بس كان لسه مفيش مفهوم حقيقي للاستدامة. فيه بعض الفلاسفة حاولوا توعية الناس تجاه المحافظة على البيئة والتفكير على المدى البعيد لكن محدش سمع لهم. في القرن العشرين بعد الحرب العالمية التانية أنشأت الأمم المتحدة اليونسكو واللي هدفه هو تعزيز أهمية الثقافة الإنسانية والعلوم، وفي أواخر القرن العشرين انشئ علم التغير المناخي، واللي عن طريقة زاد الوعي بمفهوم الموارد وتأثيرها على طبقة الأوزون واستمرارية الحياة، ومن هنا بدأ التفكير في الاتجاه لموارد الطاقة المتجددة ودراسة أي مشروع جديد من وجهة نظر الاستدامة.