يعني إيه E-wallet/ محفظة الإلكترونية ؟

موبايلاتنا بقيت مليانا أبلكيشن بتسهل علينا حياتنا اليومية وبتسرعها، واكيد مفيش اهم من الفلوس ومعاملاتنا المالية محتاجين نكون علي طول عارفين اخر اخبارها، وده سبب ظهور ال Electronic Wallet أو الـ E-Wallet.

إيه هي ال E-Wallet؟

هي ابلكيشن على الموبايل تبع البنوك، ممكن يتربط بحساب بنكي، وممكن لأ، بيستخدم فى عمليات الدفع وتحويل الفلوس من عميل لعميل، وبيعتبر نوع من الحسابات المدفوعة مقدما، لأنك بتشحنها بالفلوس اللي بتحتاجها في دفع فواتيرك. الخدمة بدأت فى مصر سنة 2013 ومشترك فيها لغاية دلوقتي حوالي 17 بنك.

مميزاتها:

1- ممكن تربطها بالكروت البنكية العادية، زي كارت الخصم المباشر Debit card، والكارت الائتماني Credit Card، و الكروت المدفوعة مقدما Prepaid Card، وفى شوية بنوك بتسمح بربطها بكروت المعاش والمرتبات. 

2-بتساعدك فى تنظيم ميزانيتك لأنك بتقدر تتابع كل اللي صرفته بسهولة. 

3-بتسهل حياتك عشان بتقدر تدفع كل اللي عليك من مكانك، وكمان بتقدر تحساب في أي مكان من غير ما يبقى معاك كاش أو كروت بنكية.

4-تقدر تدفع بيها فواتير خدمات المياه والغاز والكهرباء.

المحفظة بتتشحن عن طريق إيداع الكاش فى البنك اللي طلعت منه

 5-وممكن كمان تدفع مخالفات العربية عن طريقها، وتحجز تذاكر الطيران.

 6-شحن الموبايل أو دفع فواتيره بيتم عن طريق الـ E-wallet بسهولة.

7-بتساعد فى مبادرة "باي باي نقدية" لأنها بتجنبك استخدام الكاش.

8-كمان بتجنبك التعرض للعدوى من الأمراض لأنها تعتبر من الخدمات اللاتلامسية، مفيهاش نقل فلوس من إيد لإيد.

ازاي اشحنها:

المحفظة بتتشحن عن طريق إيداع الكاش فى البنك اللي طلعت منه، أو عن طريق تحويل الفلوس من عميل لعميل من المحفظة نفسها.

البنوك المصرية المشتركة فى الخدمة:

ما بين البنوك المشتركة فى ال E-Wallet  جمعنا لكم البنوك اللي عندهم الخدمة مجانية وبيعرضوها للاتنين، عملائهم وكمان الناس اللي معندهمش حسابات فى بنوكهم. 

هتقدر تلاقي كل الأبلكيشن بسهولة على Google Play و Apple Store.

 -البنك الأهلي المصري 

اسم الابلكيشن: فون كاش NBE Phone Cash

 -البنك التجاري الدولي CIB 

اسم الابلكيشن: المحفظة الذكية Smart wallet

  -بنك اسكندرية  

اسم الابلكيشن: محفظتي

 -المصرف المتحد 

اسم الابلكيشن: محفظة UB الرقمية /UB  digital wallet

 -بنك مصر 

اسم الابلكيشن: BM wallet

 -بنك القاهرة  

اسم الابلكيشن: القاهرة كاش Qahera Cash

  -البنك الأهلي الكويتي 

اسم الابلكيشن: ABK Egypt Mobile wallet

  -بنك قناة السويس 

اسم الابلكيشن: SCB E-Wallet