يعني إيه I-Score, وتأثيره على علاقاتك بالمنتجات البنكية!

تاريخك المالي وطريقة سدادك لديونك، وطريقة استخدامك للكريدت كارد، كل الحاجات دي بتبني تاريخك الائتماني، أو سجلك المالي عند البنوك وبيتضمن ديونك الحالية وأي كريدت كارد عندك.

وفي الآخر، وبحسبة معينة، بيتمثل تاريخك المالي في رقم من 400 إلى 850، وده بيبقى الـi-score. 

وكل ما زاد الرقم، كل ما ده بيدي انطباع للبنك أو الشركة الائتمانية إنك شخص كفء، وبتسدد ديونك في الوقت المناسب.

مين المسؤول عن تقديم التقارير الـi-score ؟

حالياً في شركة وحيدة مرخصة كشركة استعلام ائتماني، وهي الشركة المصرية للاستعلام الائتماني، وهي مرخصة من سنة 2005، وعندها كل البيانات الخاصة بالتاريخ الائتماني للأفراد والشركات.

اقرأ كمان: ايه المعاملات البنكية اللي هتبوظ الـ I-Score بتاعك؟

هو ليه الـi-score مهم؟

الـi-score هو تقرير عن طريقة تعاملك مع الديون، وبيبين إن كنت شخص قادر على تسديد ديونك في وقت مناسب من غير مشاكل أو غرامات، وده اللي بتبص عليه البنوك أو أي شركة بتوفر خدمات ائتمانية لما أنت بتيجي تقدم على قرض أو خدمة ائتمانية عشان تقرر إن كانت تديهولك أو لا. 

ولو كان التقرير مش في صالحك، فهو كدة بيقول للهيئة اللي أنت رايح لها، خلى بالك الشخص ده مش محل ثقة، وممكن يرفضوا طلبك، أو يعلوا سعر الفايدة عليك.

ممكن تقدم أونلاين على موقع الشركة المصرية للاستعلام الائتماني.

مصادر المعلومات اللي الشركة المصرية بتعتمد عليها في التقرير:

• معلومات بتاخدها من البنوك مباشرة، وهي بتحتوي على كل البيانات الشخصية للعميل، وناريخه الائتماني.
• معلومات بتاخدها من البنك المركزي، وده بيتضمن الأشخاص اللي عليهم منع من البنك المركزي.

أجيب التقرير إزاي؟

• ممكن تجيب نسخة من التقرير عن طريق إنك تقدم طلب في البنك اللي بتتعامل معاه، وتدفع الرسوم، وبيبقى التقرير صالح لمدة 15 يوم.
• ممكن تقدم أونلاين على موقع الشركة المصرية للاستعلام الائتماني.

هل ممكن اعترض على التقرير؟ 

اه ممكن، عن طريق البنك أو الشركة المصرية للاستعلام الائتماني.