يعني ايه تأمين مؤقت على الحياة وامتى هتحتاج تستخدمه؟

التأمين على الحياة هو تغطية للخسائر الإقتصادية  اللي محتمل حدوثها في حالة الوفاة، فمثلاً في حالة التأمين على حياة رب الأسرة، فـ التأمين بيكون ضد  الخسائر المادية اللي هتحصل في الحالة دي واللي أهمها نقص أو انقطاع مصدر الدخل الرئيسي للأسرة، بس وقت التأمين هيقابلك أكتر من نوع تأمين لنفس الغرض، النهارده هنتكلم عن تأمين الحياة المؤقت 
 

أهم عيوب التأمين المؤقت مفيش استرداد للمبلغ بعد مدة التأمين ما تخلص

التأمين المؤقت

وهو التأمين على الحياة لفترة معينة بتبدأ من سنة  لما المؤمن عليه يوصل لسن معين، والغرض منه هو تعويض المؤمن عليه في حالة الوفاة خلال مدة التأمين.
 

ومن أهم مميزاته: 

• القسط اقل من تأمين الأستثمار و الأدخار بشكل كبير
   

أهم عيوبه هي:

• مفيش استرداد للمبلغ بعد مدة التأمين ما تخلص.
   

ايه الحالات اللي هتحتاج فيها التأمين المؤقت؟
 

1- بتشتري بيت أو منتج جديد بالتقسيط

وقت تقسيط بيت أو الدخول في مديونية لفترة معينة بيكون فيه خوف من إمكانية التسديد اذا حصل وفاة هتأثر على مصدر الدخل الرئيسي اللي بيتم تسديد القرض من خلاله، فـ ساعتها التأمين هيكون حل مناسب جداً لتسديد المديونية من خلال التعويض.
 

2-  عندك شغل مؤقت فيه مخاطرة

عشان تغطي المخاطرة اللي هتتعرضلها لفترة من الوقت زي مثلاً مرحلة بناء أو تجديد في بيتك أو شغلك ممكن تشتري تأمين مؤقت وساعتها هيكون القسط بسيط وهيحمي الأسرة من انخفاض مصدر الدخل.