يعني ايه سندات، وايه أنواعها في البورصة المصرية؟

يعني إيه سندات؟

السندات هي طريقة تمويل بتستخدمها الحكومة وشوية شركات لتمويل مشاريعهم. السند بيبقى دين على الحكومة أو الشركة، بمعنى إنك بتسلفهم فلوسك على أساس إنك بتاخد عليها فايدة، وبتبقى لمدة معينة، وبيتم صرف الفايدة على فترات معينة، وبعد كدة لما مدة السند بتخلص، بيتردلك فلوسك. 

مدة السندات:

بتختلف مدة السندات، فهي ممكن تكون لمدة سنة أو حتى 20 سنوات على حسب نوعها.

السندات قصيرة الآجل: أقل من 5 سنوات.

السندات متوسطة الآجل: من 5-10 سنوات.

السندات طويلة الآجل: أكتر من 10 سنوات.

 السندات بتبقى استثمار مضمون مقارنة بالاستثمار في البورصة، بسبب إن لو حصل أي مشاكل في الشركة، فأول حاجة لازم تسددها هي السندات والديون. وبتختلف نسبة المخاطرة في الاستثمار في السندات على حسب نوعها، ونسبة العائد برضو.

إيه ميزة السندات؟

بالنسبة للشركة اللي بتصدر السندات:

• السندات مفيدة لإنها بتسمحلها تمول مشاريع ماعندهاش ميزانية ليها، ولكن من غير ما تبيع أسهم للشركة، وتدخل مالكين جداد في الشركة، ولكن طبعاً بيبقى عليها عبء توفير الفايدة للمستثمرين في السندات.

• نسبة العائد اللي بتصرفه الشركات على السندات للمستثمرين أقل من الفايدة اللي هتدفعها للبنك لو أخدت قروض.

بالنسبة للمستثمرين:

• السندات بتبقى استثمار مضمون مقارنة بالاستثمار في البورصة، بسبب إن لو حصل أي مشاكل في الشركة، فأول حاجة لازم تسددها هي السندات والديون. وبتختلف نسبة المخاطرة في الاستثمار في السندات على حسب نوعها، ونسبة العائد برضو.

أنواع السندات الموجودة في البورصة المصرية :

بالنسبة لسندات الشركات:

1. سندات بعائد ثابت

السندات دي بتصدر بعائد مش بيتغير والشركة بتحدد نسبة العائد، وبيتم صرفه على حسب اللي الشركة محدداه، ممكن سنوي، أو نص سنوي، أو ربع سنوي.

2. سندات بعائد متغير

في حالة السندات دي، فهي بتبقى مربوطة بعوامل معينة بتحددها الشركة، وبيتم تغيير العائد بصفة دورية على حسب التغيرات في العوامل دي.

3. سندات التوريق

النوع ده من السندات بيبقى هدفه الحصول على سيولة نقدية، لإن الشركة بتحول أقساط القروض الخاصة بيها لسندات عشان تضمن تدفق مالي لسداد القروض، وبكدة بتحول القروض البنكية لأوراق مالية.

بالنسبة للسندات الحكومية:

1. سندات الخزانة 

سندات الخزانة هي ديون على الحكومة بتصدرها لتمويل مشاريعها، وهي بتبقى استثمار طويل الآجل، لإن مدة السندات بتتراوح من سنتين لـ20 سنة.

2. سندات الإسكان

سندات الإسكان بتصدرها الحكومة لتمويل المشاريع الإسكانية اللي في متناول يد المواطن العادي.

3. سندات التنمية 

عادة بيتم إصدار سندات التنمية بالدولار.

ضمانات السندات:

في نوعين من السندات، سندات مضمونة بأصول ثابتة، وإسمها سندات بضمان عيني، وفي الحالة دي الشركة بترهن أصل من أصولها لتمويل السندات، ولو حصل للشركة مشكلة، فبيتم بيع الأصل المرهون وبيسترد المستثمرين فلوسهم.

النوع التاني بيبقى سندات غير مضمونة، وفي الحالة دي الشركة ما بترهنش أي حاجة من أصولها.