يعني إيه وديعة وايه هي مميزاتها وعيوبها؟

الوديعة هي وسيلة من وسائل الإدخار اللي بيوفرها البنك لعملائه، وبتعتمد على إن العميل بيحط مبلغ مالي معين في حساب في البنك، وبيوافق على أن الفلوس دي تفضل في البنك لمدة معينة بدون ما يقدر يصرفها، وفي المقابل، البنك بيصرف له فايدة على المبلغ ده.

ليه البنك بيقدم خدمة الودايع؟

البنك بياخد الفلوس اللي في الودايع ويستثمرها في حاجات تانية بيكون العائد عليها أكبر من الفايدة اللي بتوصل للعميل، أو في بعض الأحيان بيستخدم الفلوس دي في تسليف القروض لعملاء آخرين، وبرضو بيحسب عليهم فايدة أكبر من فايدة الوديعة.

إيه فايدة الوديعة؟

• الوديعة فايدتها الأساسية أنها مضمونة، بمعنى إن المخاطرة فيها شبه منعدمة لإن البنك بيضمنلك نسبة معينة من العوايد اللي بتوصلك حسب الخطة المتفق عليها مع البنك، غير مثلاً لو استثمرت فلوسك في البورصة، فا دي مخاطرتها كبيرة لإنها مرتبطة بتحركات السوق، ومافيش أي ضمانات لنسبة عوايد معينة.

• نسبة الفايدة على الوديعة بتبقى أعلى من حساب التوفير بسبب إن البنك ضامن إن الفلوس دي هتفضل عنده طول المدة المتفق عليها.

• ممكن تطلع كريدت كارد بنسبة معينة من الوديعة.

نسبة الفايدة على الوديعة بتبقى أعلى من حساب التوفير بسبب إن البنك ضامن إن الفلوس دي هتفضل عنده طول المدة المتفق عليها.

تعرف الفرق بين الوديعة وشهادات الاستثمار؟ اعرف أكتر من هنا: إيه الفرق بين الوديعة وشهادة الاستثمار؟

إيه عيوب الودايع؟

• العيب الأساسي إن الفلوس دي مش هتقدر توصلها غير بعد إنقضاء المدة، ولو حبيت تفك الوديعة لازم تدفع غرامة.

• فايدة الودايع برضه أقل من طرق تانية للاستثمار ممكن يكون العوايد فيها أكبر.

• الوديعة مش هتجيبلك عائد كبير إلا لو كان المبلغ كبير جداً.

• لو تم تغيير سعر الفايدة من البنك المركزي وفلوسك في وديعة فهيتم تطبيق التغيير على فلوسك، وبكدة نسبة الفايدة قلت عن البداية، ومش هتقدر تعمل حاجة لغاية إنقضاء مدة الوديعة.