أرخص أنواع أكل في القاهرة

القاهرة مليانة خروجات وفُسح كتير ،وطبعا لازم أي خروجة يكون فيها أكل .. بس لو أنت آخر الشهر والميزانية خرّمت منك، دي أرخص الأكلات اللي ممكن تلاقيها في القاهرة وفي نفس الوقت هتتبسط. 

1. أهم وأرخص وجبة في مصر هي الفول والطعمية :

 وممكن تجرب الابتكار فيهم زي الفول بالسجق ،طعمية بالبطاطس أو الطعمية في عيش فينو  ومن أشهر المطاعم اللي بتقدم الفول والطعمية بطعم مميز هما نعمة في العجوزة أو مطعم أشرف في شارع القصر العيني أو عم بشندي في مدينة نصر والأسعار بتبدأ من 3.50 ولو أنت أكّيل جامد هتشبع جدا بـ15 جنية.

2.تاني أهم وجبة للمصريين هي طبعا الكشري وطاجن المكرونه :

وأكيد مفيش زي كشرى التحرير أو كشرى هند أو سيد حنفي والأسعار بتكون من 10 لـ20 جنية تقريبًا.

ممكن تجرب الابتكار في الفول والطعمية زي الفول بالسجق ،طعمية بالبطاطس أو الطعمية في عيش فينو.

3.الحواوشي والكبدة

 طبعا ماينفعش نسيب الجانب الشعبي اللي جوانا :اللي ماينفعش يعيش من غير حواوشي الرفاعي في السيدة أو الربيع وكبدة البرنس في إمبابة وممكن كمان يوكل في الزمالك والأسعار في حدود 25 لـ60 جنية.

4. وأكيد مش هننسى الأكل البيتي :

 اللي ماينفعش نستغنى عنه وممكن وقتها تروح عند "فَسَحة سُميّة" في وسط البلد هتتبسط جداً وأسعارها من 50 لـ60 جنيه بالكتير.

5. ماتحرمش نفسك من حاجة :

طبعًا وجودنا في آخر الشهر أو في موود التوفير ده مايمنعش إننا ناكل اللي إحنا عاوزينه زي لو عايز نودلز مثلا فعندنا Asian Corner اللي بيقدم كمية وجودة كويسين جدا بالنسبة للسعر اللي بيبدأ من 40 جنيه للوجبة.