إزاي بيأثر على ميزانيتك : مسئولية الأطفال وتربيتهم

المجتمع بتاعنا بيحب الأطفال وفي تشجيع جامد للناس كلها إنها تخلف وتجيب عيال، ولكن أغلب الناس بتجري ورا فرحة الخلفة وبتنسى تفكر هو الطفل ده هيكلفهم قد إيه.

أول حاجة هو تقسيم المصاريف لمراحل: مرحلة ما قبل الولادة، ومرحلة الطفولة، ومرحلة المدرسة.

مصاريف مرحلة ما قبل الولادة تتلخص في الآتي:

مصاريف العناية الطبية للأم

ودي طبعاً بتختلف من دكتور للتاني، وبتتراوح من 40 جنيه للكشف لغاية 700 جنيه على حسب خبرة الدكتور ونوع العيادة أو المستشفى ولو استشاري ممكن الرقم يزيد لـ2500 جنيه، بس متوسط سعر الكشف هو 150-300 جنيه. وعادة بينصح بالكشف مرة في الشهر على الأقل، وده معناه 9 مرات على الأقل أثناء فترة الحمل.

مصاريف التحاليل والسونار

الكشف حاجة والفحوصات حاجة تانية، أغلب الدكاترة بتطلب تحاليل طبية ده غير السونار للكشف على الجنين. تكلفة السونار بتتراوح من 150-500 جنيه حسب نوعه، ومتوسط تكلفة التحاليل الطبية هي 150-300 جنيه، وطبعاً الرقم بيختلف على حسب طلبات الدكتور، وفي تحاليل متخصصة ممكن تكلف أكتر من كدة بكتير. وعادة التحاليل بيتم طلبها كل شهرين تقريباً، والسونار كل 3 شهور تقريباً.

مصاريف المكملات الغذائية

عادة الدكتور بيوصف نوع من أنواع المكملات الغذائية ومتوسط التكاليف بتبقى من 50-100 جنيه شهرياً.

مصاريف الولادة

أسعار الولادة الطبيعية بتتراوح من 2500-10,000 جنيه على حسب نوع المستشفى، وبالنسبة للولادة القيصرية بتتراوح ما بين 5000-17,000 جنيه.

مصاريف الحضانة هتختلف اختلاف كبير حسب نوع الحضانة وموقعها، متوسط المصاريف هي 700-3000 جنيه في الشهر

مرحلة الطفولة:

مصاريف الأكل 

تختلف على حسب نوع الأكل اللي هتوفره لطفلك، بس المتوسط هو 1500-2000 جنيه في الشهر وطبعاً بيختلف من مرحلة لمرحلة ونوع الأكل اللي أنت هتقدمه لطفلك.

مصاريف الحفاظات

متوسط استهلاك الطفل هو 10 حفاظات في اليوم، فمتوسط مصاريف الحفاظات الشهري هو 900-1000 جنيه.

مصاريف الحضانة

مصاريف الحضانة هتختلف اختلاف كبير حسب نوع الحضانة وموقعها، متوسط المصاريف هي 700-3000 جنيه في الشهر

مصاريف العناية الطبية

ثمن المصاريف الطبية هتبقى مشابهة لمصاريف العناية الطبية للأم قبل الولادة، ومتوسط الشهر هيبقى 150-300 جنيه للكشف، ويُنصح بإن يتم الكشف على الطفل مرة في الشهر على الأقل.

مصاريف غير متكررة

وده بند الحاجات اللي بتحتاجها للطفل نفسه زي سرير للطفل، سترولر (عربية أطفال)، كرسي للعربية، اللبس، لعب أطفال، وهكذا، ومتوسط سعر الحاجات دي بتبقى على الأقل 5000 جنيه إلى 10,000 جنيه، وممكن تبقى أكتر من كدة.

مرحلة المدرسة:

مصاريف المدرسة

مصاريف المدرسة هتبقى زيادة على المصاريف اللي فاتت مع تغييرات بسيطة. متوسط مصاريف المدارس الخاصة 5000- 40,000 جنيه سنوياً، وبتختلف على حسب نوع المدرسة، والمرحلة العمرية.

مصاريف الأوتوبيس وإحتياجات المدرسة

برضو المصاريف دي بتختلف جداً من مدرسة للتانية، بس بتقع ما بين 1000-6000 جنيه سنوياً.