إيه اللي بيحصل لما الدعم بيتشال؟

في ٢٠١٧ وبسبب التقديم على قرض من صندوق النقد الدولي، قررت الحكومة إنها تشيل الدعم تدريجياً بسبب العبء اللي دعم المحروقات وباقي السلع الأساسية بيحطوها على ميزانية الدولة، وفي نفس الوقت الحكومة كانت بتقول إن الدعم بيروح لناس مش محتاجاه بسبب إن كل المواطنين كانوا بيستنفعوا من فوايد الدعم.

يعني إيه دعم؟

هو نوع من أنواع المساعدة اللي بتقدمها الحكومة عشان تساعد مواطنيها سواء أفراد أو شركات على تحمل أعباء المعيشة.

لو حابب تعرف أكتر عن الدعم ممكن تقرأ هنا.

يعني إيه شيل الدعم؟

شيل الدعم معناه إن الفلوس اللي الحكومة كانت بتدفعها عشان تساعد المواطن وتقلل التكاليف عليه بتروح لحاجات تانية زى الصرف على تحسين التعليم والصحة…..إلخ. ودي واحدة من طرق التوفير اللي الحكومة بتتبعها.

من المشاكل اللي ممكن يسببها شيل الدعم زيادة معدلات البطالة لأن ممكن الشركات تضطر تخفض عدد الموظفين عشان يقللوا المصاريف.

الأهداف الأساسية من شيل الدعم:

• تخصيص الفلوس اللي بتروح للدعم لحاجات تانية ممكن تحسن من حياة المواطن.
• شيل الدعم من على الطاقة زي البنزين و الكهرباء بيعمل حد للاستهلاك، كل ما الحاجة بتبقى أغلى، كل ما الناس بتحاول توفر.
• تخصيص الدعم للناس اللي فعلاً محتاجاه.
• الحد من تلوث البيئة.

إيه المشاكل اللي بيسببها شيل الدعم؟

• شيل الدعم من على حاجات أساسية زي البنزين والكهرباء بيغلي الأسعار لكل المنتجات تقريباً لانهم داخلين كمصاريف في التصنيع والخدمات.
• زيادة التضخم مرة واحدة بسبب غلاء الأسعار اللي بيخلي القوة الشرائية للعملة المحلية تقل، وبالتالي التضخم بيزيد وده اللي حصل فعلاً في مصر بعد التعويم وشيل الدعم ووصل التضخم لـ٣٣% تقريباً في أغسطس ٢٠١٧.
• زيادة الأسعار بالنسبة للمصدرين لإن المنتج الأساسي زاد سعره، وبالتالي بيقلل من الميزة الأساسية للمنتجات المصرية واللي هي رخص سعرها.
• زيادة معدلات البطالة لأن ممكن الشركات تضطر تخفض عدد الموظفين عشان يقللوا المصاريف.