ازاي تبدأ تتكلم مع أطفالك عن الفلوس فى 8 خطوات!

الأب والأم عليهم دور كبير في تعليم أطفالهم دروس مالية من وهما صغيرين عن طريق الألعاب والمناقشات وده هيساعدهم على انهم يبنوا شخصية سوية وعادات مالية قوية في التعامل مع الفلوس.

فى 8 خطوات ممكن تبدأ منهم تتكلم مع أطفالك عن الفلوس، هما:

1-   المشاركة في التعاملات بالفلوس

خلي طفلك جزء من التعاملات المالية الخاصة بيك يعني مثلًا خليه يشوفك وأنت بتصرف يوميًا في الأساسيات ودفع الفواتير الشهرية، ومفيش مانع تاخده معاك السوبر ماركت وأنت بتتسوق.

2-   شاركه القرارات المالية

يعني اتكلم قدامه وخليه يشترك معاك برأيه في شراء السلع المختلفة، وقوله على الفواتير الشهرية اللي بتدفعها، وفكرة إن الطفل يشوفك بتعمل كدا بيخليه يفهم ويتكلم أكتر معاك عن الفلوس وده بيديك مجال انك تتناقش معاه.

3-   اديله زيادة في المصروف

من الحاجات اللي بتزود الخبرة المالية عند الطفل إنك على فترات تديله زيادة في مصروفه خاصة لو نوع من المكافأة، وده هيخليه يحس بالمسؤولية المالية، واتناقش معاه هيعمل ايه بالزيادة دي شوفه بيفكر ازاي.

أما لو عايز تعلم ولادك التحويش فممكن تقرأ هنا، 5 أفكار تعلم بيها ابنك التحويش من بدري
 

4-   ألعاب الفلوس

اللعبة أفضل طريقة ممكنة تقدر توصل بيها المعلومات للطفل بدل الكلام الكبير والمرهق ذهنيًا ليه، أنت عارف إن ممكن تعلم ابنك او بنتك إدارة الفلوس من خلال تجربة تعليمية ممتعة عن طريق الألعاب.

علم طفلك سياسة التحويش وإنها طريقة ممتازة علشان يقدر يجمع مبلغ

5-   التحويش في الحصالة

علمه من بدري أهمية التحويش وإنها طريقة ممتازة علشان يقدر يجمع مبلغ يفيده قدام لو عاوز يشتري حاجة مثلًا، ومفيش مانع تشجعه زي مثلًا كل ما تلاقيه بيحوش مبلغ تديله مكافأة.

6-   مفاهيم لازم تعلمها لطفلك

·   التحويش: الفلوس اللي بيقدر يحوشها من مصروفه.

·   الصرف: والحكمة في إنفاق الفلوس بأفضل شكل ممكن وبدون تبذير.

·   التبرع: الفلوس اللي ممكن يتبرع بيها علشان قضية معينة.

·   التكاليف: لازم تفهمه قدراتك المالية وإن كل حاجة بحدود والميزانية مش مفتوحة.

7-   خليك مستمع جيد

لازم تدي لطفلك الانتباه والتركيز في كل كلمة بيقولها عن الفلوس لأن بيكون عنده أسئلة كتير لازم يلاقي لها إجابة فخليه يسأل براحته، وتقدر تديله المعلومة من خلال فيلم أو قصة أو كتب أو أي حاجة مُسلية وبسطله الأمور بأمثلة يقدر يفهمها من حياته اليومية.

8-   فتح حساب بنكي

تقدر تفتح لهم حساب توفير في البنك وتكلمهم عن التعاملات البنكية بأسلوب بسيط، وعلمهم الفرق بين الحسابات الجارية وحسابات التوفير وده هيساعدهم أكتر في فهم التعامل مع الفلوس. وممكن تبدأ تعلمه التعامل مع منتجات بنكية تانية الخاصة بالتحويش زي شهادات الاستثمار.

قارن بين شهادات الاستثمار والودائع في البنوك المختلفة على فايدتي!