ازاي تشتغل على نفسك في 7 خطوات قبل ما تفكر تجمع ثروة!
تاريخ النشر: 10 يناير 2022 نصايح ببلاش
ماتخليش حاجة تعطلك خد النصايح من الناس الإيجابي والسلبي وحاول تتعلم من أخطائك
المفروض قبل ما تفكر إنك تبقى غنى وتكون ثروة أو إنك تدخل بيزنس وتحقق أرباح كبيرة لازم تفهم شوية حاجات الأول، مبدئيًا كدا أنت محتاج تشتغل على نفسك وتطور من مهاراتك علشان تبقى مستعد للعالم اللي هتدخل عليه.
كتير أوي بيدخلوا في أي بيزنس وبيخسروا وبعدين بيقعدوا يدوروا ايه الأسباب لكن في الغالب بتكون إنهم من البداية ما اشتغلوش على نفسهم صح وبالتالي أكيد كان ناقصهم حاجة مهمة.
طيب ازاي اشتغل على نفسي؟
1- السر في تحديد الأولويات
اوعى تشتت نفسك وياريت تحدد أولوياتك بمنتهى الهدوء والذكاء وهتلاقي النتيجة مبهرة أفضل بكتير ما تدخل نفسك في حاجات كتير، ركز على مهمة واحدة بس أو مجموعة من المهام لكن بشكل محدد.
2- الجودة أهم
ركز على جودة الشغل مش كمية الحاجات اللي خلصتها يعني لما تيجي تنجر حاجتين بكفاءة عالية أفضل من 10 بكفاءة ضعيفة، وماتضغطش دماغك علشان ما تتعبش نفسيًا، واستغل وقتك بأفضل شكل ممكن وكمان حاول تهتم بالترفيه لأنه هيفرق معاك نفسيًا وكنوع من المكافأة.
3- كمل في نفس طريقك
ماتخليش حاجة تعطلك خد النصايح من الناس الإيجابي والسلبي وحاول تتعلم من أخطائك لكن ما تخليش ده يحطمك لأنك هتقابل ناس كتير بتنقلك طاقة سلبية، اسمع للكل لكن متخليش ده يعطلك.
حاول تعرف ناس شاطرة في مجال البيزنس وتسمع منهم كتير
4- اتعلم من أصحابك الشطار
حاول تعرف ناس شاطرة في مجال البيزنس وتسمع منهم كتير وتعرف تجارب أكتر وتستفاد منهم، ادخل في دواير النوعية دي من الصحاب هتستفاد أوي.
5- اللي بدأته تخلصه
قمة النجاح إن اللي بدأته تكمله، ولو وقعت قوم وكمل عادي، والفكرة إنك تتعلم من أخطائك وتكمل ما تجيش في نص الطريق وتعطل، وحاول قدر الإمكان تتوقع الأسوأ علشان لما يحصل عزيمتك ما تقلش.
6- قسم الكبير لشغل صغير
بالنسبة لأي مهمة كبيرة حاول تقسمها لأجزاء صغيرة يعني لو داخل في مشروع ضخم حاول تحط نفسك في المكان المناسب وسكن كل واحد حواليك في المكان اللي يقدر يبدع فيه، وساعتها هتلاقي الدنيا سهلة وبسيطة.
7- خليك مدير ناجح
بص علشان توصل للمرحلة دي لازم تبدأ من تحت وتاخد وقتك، ومع الوقت والخبرات هتقدر تحقق أهدافك بشكل أكتر وضوح من قبل كدا وكمان ساعتها هتعرف تتعامل مع المشاكل وتحلها من غير ما تعطل.
ولو ناوي تفتح البيزنس بتاعك قريب ممكن تأخد شوية افكار من هنا، ازاي تبقي صاحب Startup ناجحة: الفكرة!
