افكار موفرة للـ Picnic في إفطار رمضان 2021
تاريخ النشر: 19 أبريل 2021 نصايح ببلاش
اعمل picnic في رمضان ومتدفعش كتير
في الفترة الأخيرة زادت فكرة الـ Picnic في الحدائق العامة، وبمناسبة وجود رمضان مع بداية دخول فصل الصيف، هنقولكم على شوية افكار موفرة تفطروا بيها بره البيت.
تعمل خير في رمضان ازاي؟ اعرف أكتر من هنا: مؤسسات بتقبل التبرعات في رمضان 2021
فطار الفلوكة:
مين ميحبش يفطر على النيل، وبعيد عن المطاعم والمراكب الغالية ممكن تأخدلك فلوكة مع أصحابك وتجيبوا فطاركم وتقضوا ساعتين في قلب النيل. بالنسبة لأسعار تأجير الفلوكة فبتبدأ في حدود 150 جنيه للساعة، وبتختلف على حسب قدرتك علي الفصال، متنساش بس تعمل حساب المراكبي معاك في الأكل.
مراسي تأجير الفلوكة في القاهرة والجيزة:
- مرسي ماسبيرو :المرسي ده اتنقل لتحت الكوبري قدام الوكالة، بس هتلاقي المراكبية مستنين قدام ماسبيرو
- مرسي جاردن سيتي : هتلاقيه قدام فندق سميراميس، ويعتبر أغلى مرسي عشان فيه مراكب شراعية
- مرسي الجزيرة: هتلاقيه جوا حديقة الجزيرة قدام دار الأوبرا، وفي تذاكر للحديقة قبل التأجير
- مرسي الجيزة: موجود قدام فندق فورسيزون الجيزة ، جنب كوبري الجامعة
- مرسي المنيل: أخر شارع عبدالعزيز آل سعود، جنب كوبري عباس
- مرسي الزمالك : في شارع أبو الفدا، قدام كلية البي اي اس
فطار شارع المعز:
في أكتر من مطعم في شارع المعز ممكن تختار فطارك منهم، بعضهم فيه كراسي والباقي علي الواقف، أو ممكن تروح تقعد على واحد من السلام الأثرية للمساجد اللي هناك، وبعدها تقوم تتمشي شوية واستمتع بالجو الرمضاني في الشارع.
Picnic الأزهر بارك:
تعتبر حديقة الأزهر أشهر جنينة في مصر خصوصا بسبب موقعها اللي بيعتبر في وسط البلد، لأن بوابتها الرئيسية على شارع صلاح سالم، وبينها وبين شارع الأزهر أقل من 10 دقايق. من أكتر الحاجات اللي بتميز الحديقة هو موقعها بين مساجد مصر القديمة المشهورة، والقلعة اللي بتقدر تشوفهم بسهولة من أكتر من موقع جوا الحديقة.
الأزهر بارك فيها أكتر من أختيار للفطار، ما بين مطعم ستوديو مصر والمصراوية، والـ Picnic طبعا، لأنك تقدر تدخل الأكل ببلاش، بس من غير حلل أو أطباق معدنية، ومتنساش طبعا تجيب حاجة تقعد عليها وكيس تلم فيه الزبالة قبل ما تمشي.
اسعار التذاكر والمواعيد:
- من الأحد للخميس، 25 جنيه
- الجمعة والسبت، 30 جنيه
- المواعيد كل يوم في رمضان من 11 الصبح لـ 10 بليل
- دخول الأكل ببلاش
متنساش تأخد خريطة الحديقة من الباب عشان ماتهوش!
الفطار بره البيت مش لازم يكلفك كتير
حدائق تانية ممكن تعمل فيها Picnic:
حديقة الميريلاند:
موقعها: في مصر الجديدة
اسعار التذاكر والمواعيد:
- من الأحد للخميس: 20 جنيه
- الجمعة والسبت: 30 جنيه
- المواعيد كل يوم من 9 الصبح لـ 11 بليل
فاميلي بارك/حديقة الأسرة
موقعها: امام بوابة الرحاب 2
أسعار التذاكر والمواعيد:
- من الأحد للخميس: 60 جنيه
- الجمعة والسبت: 70 جنيه
- المواعيد في رمضان من 12 الضهر لـ 12 يليل
- دخول الأكل بـ 20 جنيه
